Bombardime në lindje të Ukrainës, ndihma amerikano-britanike zmbraps rusët

Artileria ruse vazhdon të bombardojë lindjen e Ukrainës, si për shembull në Kramatorsk. Megjithatë, mbërritja e artilerisë së lëvizshme amerikane dhe britanike po u jep forcë ukrainasve të kundërsulmojnë.

Pala ukrainase thotë se kapacitetet agresive të Rusisë janë reduktuar ndjeshëm, me rreth 100 ushtarë që janë vrarë në fushën e betejës çdo ditë që nga fillimi i muajit.

Pas një sulmi me raketë ditën e premte në Dnipro, qyteti i katërt më i madh i vendit, të paktën 3 persona mbetën të vrarë dhe 15 të plagosur.

Po të premten, skuadrat e shpëtimit gërmuan nën rrënoja në kërkim të personave të humbur, pasi një raketë ruse vrau 23 persona dhe plagosi mbi 100 të tjerë në qytetin Vinitsia, në qendër të Ukrainës.

Raketa “Cruise” e qëlluar nga një nëndetëse vrau tre fëmijë, një vajzë 4-vjeçare dhe dy djem përkatësisht 7 dhe 8 vjeç.

Policia kombëtare ukrainase ka nisur të mbledhë gjurmët e ADN-së nga mbetjet trupore të viktimave, me qëllim identifikimin e tyre. Sipas policisë, deri tani 19 nga 23 të vdekurit janë identifikuar.

Ndërkohë, sipas të dhënave të qeverisë ukrainase, nga rreth 100 të plagosurit, 80 mbeten të shtruar në Spital.

Të paktën 7 prej tyre janë në gjendje kritike për jetën.

LEXONI GJITHASHTU:

• Dyndje të rusëve në Finlandë, rriten aplikimet për viza
• Mediat sociale po dështojnë të parandalojnë urrejtjen LGBTI+