Bota dënon vrasjen e liderit të Hamasit, Irani premton hakmarrje

Presidenti i ri i Iranit, Masoud Pezeshkian ka deklaruar se do ta bëjë Izraelin të pendohet për vrasjen “burracake” të Ismail Haniyeh.

Pak pas marrjes së detyrës, Pezeshkian ka nënvizuar gjithashtu se Republika Islamike do ta mbrojë integritetin territorial, nderin, krenarinë dhe dinjitetin e saj.

Në një deklaratë të cituar nga agjencia e lajmeve “AFP”, kreu i shtetit e ka përshkruar Haniyeh si një “lider të guximshëm”.

Lideri politik i Hamasit, që jetonte në Katar, po vizitonte Teheranin për të marrë pjesë në ceremoninë e betimit të presidentit të ri.

Edhe lideri suprem i vendit, Ajatollahu Ali Khamenei tha se hakmarrja për vdekjen e tij është “detyrim për Teheranin” dhe shtoi se “Izraeli ka shtruar terrenin për një ndëshkim të ashpër”.

Reagime pati edhe nga vende të tjera të rajonit. Jordania e dënoi në mënyrën më të fuqishme atë që e quajti “vrasjen e kryer nga Izraeli”, e cila sipas saj do të çojë në thellimin e tensioneve në Lindjen e Mesme.

Në të njëjtat linja ishte edhe reagimi i Libanit. Kryeministri Naxhib Mikati paralajmëroi për një përshkallëzim serioz në rajon në një takim urgjent me kabinetin e tij.

Edhe Ministria e Jashtme kineze deklaroi se “kundërshton dhe dënon me vendosmëri vrasjen” dhe se është “thellësisht e shqetësuar” për më shumë turbulencë në rajon.

Zëdhënësi Lin Jian theksoi se, një armëpushim i përhershëm dhe gjithëpërfshirës duhet të arrihet sa më shpejt në Gaza.