Në Brazil po votohet për balotazhin që ka si konkurrentë liderin e së majtës Luiz Inacio Lula da Silva kundër presidentit të së djathtës, Jair Bolsonaro, që garon për një tjetër mandat.

Bëhet fjalë për një nga zgjedhjet më të polarizuara të historisë së shtetit amerikano-jugor, që ka rikthyer pamjen e një vendi të ndarë në dysh.

“Kjo është dita më e rëndësishme e jetës sime dhe mendoj se është e tillë edhe për vetë popullin brazilian”, ka deklaruar Lula, pasi votoi në një shkollë në San Bernardo do Kampo, në shtetin e San Paolos.

Ndërkohë, rivali i tij është shprehur i bindur për fitoren, e cila sipas tij do të ishte në të mirë të Brazilit.

“Nëse Zoti dëshiron, sonte do të fitojmë. Ose më saktë, Brazili do të fitojë”, ka deklaruar Bolsonaro pasi ka votuar pranë shkollës Roza da Fonseka, në një zonë në perëndim të Rio de Zhaneiros.

Ndërkohë, në kuadër të procesit elektoral, ka votuar edhe diaspora braziliane në Australi dhe Zelandën e Re, ku ka fituar Lula, si dhe në Japoni, ku fitues është shpallur Bolsonaro.

Bëhet fjalë për dy kandidatë shumë të ndryshëm. Lula konsiderohet si njeriu që vite më parë nxori vendin nga varfëria, por që më pas u përfshi në skandalin e kompanisë së naftës “Petrobras”, që i kushtoi disa vite burg.

Ndërkohë, Bolsonaro konsiderohet si njeriu që nuk diti të menaxhonte krizën e koronavirusit dhe humbi kontrollin e sigurisë së vendit.

LEXONI GJITHASHTU: 

• Asnjë viktimë dhe 17 raste rë reja me Covid-19 në 24 orët e fundit
• “ERE, vegël e Ramës”, PD: Nuk ka krizë energjie, prodhuam më shumë nga sa konsumuam
• “Studentët nuk mund të ndëshkohen nga qeveria”, Karabina: Diploma s’mund të privohet