Britania e Madhe: Do të shpallim Gardën Revolucionare Islamike të Iranit organizatë terroriste

Mbretëria e Bashkuar do të shpallë Gardën Revolucionare Islamike të Iranit (IRGC) organizatë terroriste, njoftuan ministrat, në një përshkallëzim të ndjeshëm të tensioneve diplomatike me Teheranin, shkruan The Guardian.

Ministria e Brendshme britanike bëri të ditur të hënën se do të ndalojë çdo formë mbështetjeje për IRGC-në, një nga degët kryesore të forcave të armatosura iraniane, pas vitesh përçarjeje politike mbi këtë çështje. Kjo masë është e barasvlershme me shpalljen si organizatë terroriste, megjithëse nuk është juridikisht e njëjtë.

Ministrat pritet gjithashtu të nxjerrin jashtë ligjit Lëvizjen Islamike të Shoqëruesve të së Drejtës (IMCR), e cila akuzohet për një sërë sulmesh ndaj objektivave hebraikë në Mbretërinë e Bashkuar, si dhe Korpusin Vullnetar të Federatës Ruse (GRU), një degë ndërkombëtare e inteligjencës ushtarake ruse.

Në një deklaratë, Ministria e Brendshme tha: “Pas shqyrtimit të kujdesshëm të të gjitha provave, ministrja e Brendshme ka arritur në përfundimin se ekziston bazë e mjaftueshme për të besuar në mënyrë të arsyeshme se secili prej këtyre grupeve është i përfshirë në veprimtari kërcënuese të mbështetura nga një shtet i huaj dhe se secili përcaktim është i nevojshëm për të mbrojtur sigurinë dhe interesat e Mbretërisë së Bashkuar.”

Qeveria tha se vendimi për ta shpallur IRGC-në organizatë terroriste erdhi pas një sërë kërcënimesh në territorin britanik, përfshirë një plan për atentat ndaj dy gazetarëve të televizionit Iran International, si dhe sulmeve kibernetike ndaj objektivave britanikë.

Ky vendim përmbys qëndrimin e mëparshëm të qeverisë konservatore, e cila kishte refuzuar ta ndalonte organizatën, dhe do ta bëjë vepër penale çdo formë mbështetjeje ndaj saj.