Britania e Madhe sanksionon politikanët serbë të Bosnjës

Pas SHBA edhe Britania e Madhe ka nisur politiken e sanksioneve ndaj politikanëve të Ballkanit.

Pre e sanksioneve britanike kanë rënë politikanët serbë të Bosnjës, Millorad Dodik dhe Zhelka Cvijanovç, për shkak të përpjekjeve të tyre për të minuar legjitimitetin e Bosnje-Hercegovinës.

Sanksionet, të cilat përfshijnë ngrirje të aseteve dhe ndalesë në udhëtim, janë të parat kundër zyrtarëve në Bosnje që bëhen të ditura nga Mbretëria e Bashkuar.

“Të inkurajuar nga sistemi i Rusisë për minim të rregullave ndërkombëtare, të dy individët kanë përdorur pozitat e tyre të autoritetit për të çuar përpara shkëputjen de facto të Republikës Sërpska, një prej dy entiteteve të Bosnje-Hercegovinës, në kundërshtim të plotë me kushtetutën e shtetit”, kanë bërë të ditur autoritetet britanike .

Më 5 janar të këtij viti, Departamenti Amerikan i Shtetit ka vënë po ashtu sanksione ndaj Dodikut.

Republika Sërpska së bashku me Federatën Myslimane-Kroate janë dy entitetet që përbëjnë Bosnje e Hercegovinën.

Organizimi i tillë është bërë me të ashtuquajturën Marrëveshje të Dejtonit, e cila i ka dhënë fund luftës në Bosnje, në vitet 1990.

LEXONI GJITHASHTU:

• Vuçiç: Serbia nuk i njeh sanksionet e SHBA ndaj Dodik
• SHBA shton sanksionet ndaj Millorad Dodik, e quan ‘person destabilizues’