Britania e Madhe zbut tonet për emigrantët: Vlerësojmë bashkëpunimin me Shqipërinë

Pas deklaratave të ashpra të Sekretares së Brendshme britanike, Suella Braveman kundër emigrantëve shqiptarë dhe kundërpërgjigjes nga kryeministri Rama, nga Britania e Madhe kanë ardhur sinjale për zbutje të toneve.

Mediat ndërkombëtare raportojnë se një zëdhënëse e qeverisë britanike, është shprehur se Britania ka një marrëdhënie të fortë me Shqipërinë dhe është mirënjohëse për punën që bën për të luftuar kontrabandistët e njerëzve.

“Ne kemi një marrëdhënie të fortë me partnerët tanë shqiptarë. Ne jemi mirënjohës për bashkëpunimin e qeverisë shqiptare dhe mbetemi plotësisht të përkushtuar për të punuar së bashku me ta”, u tha zëdhënësja gazetarëve.

Më tej ajo theksoi për gazetarët se Britania ka vullnetin për të bërë çdo gjë që është e mundur me partnerët ndërkombëtarë për të thyer modelin e biznesit të kontrabandistëve të njerëzve.

Deklaratat e sekretares së Brendshme të Britanisë së Madhe, Suella Braveman shkaktuan kundërshti jo vetëm në Shqipëri, por edhe në disa vende të Afrikës, duke i cilësuar ato si skandaloze dhe që rrisin ksenofobinë.

LEXONI GJITHASHTU

• Rama-zyrtares britanike: Shqiptarët s’janë kriminelë, drejtojnë biznese në Britani
• ‘Mos na akuzoni për dështimet tuaja’, Rama i përgjigjet Britanisë për emigrantët
• Emigrantët, The Guardian: Tirana e zhgënjyer për bashkëpunimin me Britaninë e Madhe