Ligjvënësit në Mbretërinë e Bashkuar votuan të premten në favor të vdekjes së asistuar, një çështje kontradiktore që ka përçarë ligjvënësit e partive tradicionale.

Ligji, që u paraqit për herë të parë nga deputeti laburist Kim Lidbitër, mund t’u lejojë të rriturve që kanë më pak se 6 muaj jetë të kërkojnë vdekjen e asistuar, deri më sot subjekt i aprovimit nga dy doktorë dhe një gjyqtar.

Ligjvënësit e votuan draftin me 330 vota pro dhe 275 kundër pas 5 orë debatesh intensive. Votimi do të thotë se ai mund të kalojë në leximin e dytë, duke tejkaluar pengesat politike që kishte për t’u kthyer në ligj. Por procesi do të kërkojë muaj të tërë kontrollesh dhe debate të mëtejshme.

Votimi i së premtes u konsiderua një çështje ndërgjegjeje, që do të thotë se deputetëve nuk iu desh të votonin sipas linjave partiake, por të lirë.

Çështja ka nxjerrë në pah përçarjet e thella brenda vetë partive politike, me shumë ligjvënës që e gjetën veten në kontrast me njëri-tjetrin.

Të dhënat parlamentare tregojnë se kryeministri Keir Starmer votoi në favor të draftit, i cili tani do të bëhet subjekt i debateve të shumta në të dyja dhomat e Parlamentit. Nëse aprovohet, ai do të hyjë në fuqi në 2 ose 3 vitet e ardhshme.

Mbretëria e Bashkuar nuk është i vetmi vend evropian që së fundmi ka shqyrtuar lejimin e vdekjes së asistuar. Më herët gjatë vitit, Parlamenti irlandez miratoi një apel për kthimin e saj në ligj.

Në Francë, debati u ndërpre për shkak të zgjedhjeve të parakohshme. Ndërsa Austria, Belgjika, Kanadaja dhe disa shtete të Shteteve të Bashkuara e kanë legalizuar atë.

LEXONI GJITHASHTU:

• Pastori: Pse nuk duhet lejuar të bëjë eutanazi 28-vjeçarja me probleme psikike
• Shqiptarët nuk e pranojnë dot vetëvrasjen dhe eutanazinë. Gjetjet e Barometrit