Bullgaria, veto ndaj RMV/ Në 4 shkurt mijëra bullgarë do të bëjnë homazhe në Shkup

Bullgaria nuk heq dorë nga kërcënimet ndaj Maqedonisë së Veriut për veto të re në integrimin e saj ne BE. Sipas zyrtareve bullgarë, bllokimi i rrugës së Maqedonisë së Veriut në BE vjen për shkak të diskriminimit ndaj pakicës bullgare në këtë vend.

Deklaratat e zyrtarëve bullgarë, vijnë në kohën kur tensionet në Shkup janë rritur. Më 4 shkurt në Maqedoninë e veriut, për festimin e ditëlindjes së revolucionarit maqedono-bullgar Goce Dellçev, pritet të vijnë numër i madh bullgarësh që do të kryejnë homazhe. Në këtë aktivitete, pritet të ketë dhe grupe radikale.

Oliver Spasovski, ministër i brendshëm: “Prioriteti më i lartë i kësaj Qeverie është që të ruajë qetësinë dhe stabilitetin e shtetit. Por e dimë se gjithnjë do të ketë struktura radikale, të cilat për interesa të ndryshme dëshirojnë të destabilizojnë vendin. Por kurrë nuk lejojmë që të cenohet siguria e qytetarëve tanë”.

Ministri i jashtëm Bujar Osmani vlerëson se shpallja e personave që shfaqin pretendime territoriale dhe mohim të maqedonasve, si të padëshirueshëm për shtetin, do të ndalte rrethin e kërcënimeve dhe ofendimeve.

Bujar Osmani, ministër i jashtëm i RMV-së (maqedonisht): “Duhet vendosur një princip me të cilin kush ofendon në territor të Maqedonisë së Veriut, apo do të kontestojë ekzistencën e popullit maqedonas, apo do të shfaqë pretendime territoriale, që të njëjtën ditë duhet ti ndalohet hyrja e mëtejme në shtet. Ky princip duhet të jetë bazë për politikën tonë lidhur me këtë problem. Këtë duhet ta dinë të gjithë, pasi nëse e dinë do të jenë më të kujdesshëm dhe do ta ndërpresim këtë cikël”.

Eurodeputeti Angel XHAMBAZSKI ishte ai që shkaktoi më së shumti tensione në RMV për shkak të deklaratave të tij se Maqedonia është Bullgari, dhe se është një shpikje e liderit të ish Jugosllavisë – Tito. Por provokuese ishin edhe deklaratat e deputetit bullgar Kostadin Kostadinov, i cili nga Shkupi deklaroi se Maqedonia e Veriut duhet ti aneksohet Bullgarisë sepse bëhet fjalë për një popull. Të tilla deklarata kanë bërë edhe disa zyrtarë bullgarë të cilët mohojnë gjuhën dhe identitetin maqedonas.

Kryeministri i Maqedonisë së Veriut Dimitar Kovaçevski apeloi për qetësi nga të dyja palët ndërsa kujtoi se nuk do të ketë tolerancë për ata që shfaqin pretendime territorial për shtetin e tij. Bëri thirrje edhe që policia ti shfrytëzojë të gjitha mekanizmat për mbarëvajtjen e 4 shkurtit.

LEXONI GJITHASHTU: 

• Valë raketash mbi Ukrainë, Moska hakmerret pas dërgimit të tankeve nga SHBA
• Sulm në Kishat spanjolle, një person i vrarë dhe disa të plagosur