Bumçi: Qeveria të plotësojë kushtet, Gjermania promotore e integrimit, por edhe vend kërkues

Ish-Ministri i Jashtëm, Aldo Bumçi në një intervistë për gazetaren Esmeralda Mulaj në Euronews Albania, komentoi marrjen e kryesimit të Bashkimit Evropian nga ana e Gjermanisë ku theksoi se tanimë Shqipëria duhet të plotësojë kushtet pasi Gjermania është një promotore e integrimit të Ballkanit Perëndimor po aq sa dhe një vend kërkues, gjë që sipas tij u reflektua edhe në kushtet e vendosura.

“Gjermania është mbështetëse shumë e qartë dhe e qëndrueshme e integrimit të Shqipërisë dhe Ballkanit Perëndimor, por në të njëjtën kohë është edhe vend kërkues dhe këtë e tregojnë kushtet e vendosura nga Bundestagu, ku u përcaktua rruga që duhet të bëjë Shqipëria,” – tha Bumçi teksa këmbënguli se gjithçka varet nga qeveria shqiptare.

Të mërkurën vendeve anëtare të Bashkimit Evropian iu paraqit kuadri negociues për procesin e anëtarësimit të vendeve candidate.

I pyetur se çfarë domethënie ka kjo për Shqipërinë, Bumçi tha se nuk është e një rëndësie të madhe “nëse vendi nuk përmbush kushtet”.

“Janë hapa parapërgatitor të cilat nuk kanë asnjë vlerë nëse ti nuk plotëson kushtet për të hapur negociatat. Është sikur të thuhet se Kampionati Botëror mbahet një herë në 4 vjet, por nuk ndryshon asgjë nëse nuk kualifikohesh të marrësh pjesë,” – tha ish-deputeti demokrat Bumçi.

Lexoni gjithashtu:

Kuadri negociues për Shqipërinë, çfarë pritet në vazhdim për hapjen e negociatave me BE

Kuadri negociues për Shqipërinë dhe Maqedoninë e Veriut i kalon vendeve anëtare

Shqipëria pjesë e objektivave të presidencës gjermane të BE, thotë ambasadori Peter Zingraf

Presidenca gjermane e BE-së, cilat do të jenë detyrat e Merkel

Meta e Ruçi urojnë Gjermaninë për presidencën e BE-së, garantojnë se do punojnë për përmbushjen e kushteve të Bundestagut