Burg përjetë tradhtarëve, Putin firmos ligjin: Rritet dënimi për sulmet terroriste

Presidenti rus Vladimir Putin ka firmosur ligjin që parashikon të zbatojë burgimin e përjetshëm si ndëshkim për veprën penale të “tradhtisë së lartë”.

Lajmin e bën të ditur agjencia “Tass”, sipas të cilës, deri më sot krimi në fjalë ndëshkohej me deri në 20 vjet burg.

Masa u aprovua pak ditë më parë nga Parlamenti rus, që mes të tjerash rriti edhe nga 15 në 20 vjet burg dënimin maksimal për sulmet terroriste.

Ndërkohë, në adresë të Putin ka mbërritur një letër e hapur e nënshkruar nga më shumë se 100 shkrimtarë, aktorë, gazetarë, regjisorë dhe personazhe të tjera publike.

Në të, kreut të Kremlinit i kërkohet dhënia fund e persekutimit në burg të aktivistit Alexey Navalny, si dhe lirimi i tij.

Ajo vjen pak ditë pasi ndaj kritikut të regjimit rus u ngritën akuza të reja për terrorizëm, të cilat vetë Navalny i cilësoi si qesharake.

Mes firmëtarëve janë emra të njohur të letërsisë si Margaret Atwood, Salman Rushdie, Orhan Pamuk, ndërsa nga kinemaja dhe sporti spikasin emrat e aktorit Jude Law dhe ish-futbollistit Eric Cantona.

LEXONI GJITHASHTU: 

• Sulm me armë në Teksas, 5 viktima, mes tyre një fëmijë 8-vjeç
• Berisha lobim në SHBA, kërkon të zbulojë ndikuesit në shpalljen “Non Grata”