Burimet: Trupi i Komandantit të lartë të Hezbollahut gjendet nën rrënoja në Bejrut

Trupi i një prej komandantëve më të lartë të Hezbollahut, Faud Shukr, është gjetur nën rrënoja në periferinë jugore të Bejrutit (kryeqytetit të Libanit) të sulmuar nga Izraeli, thanë dy burime libaneze të sigurisë, raporton Reuters.

Sipas mediave të huaja, ky sulm i Izraelit erdhi pas një sulmi në Lartësitë Golan të pushtuara nga Izraeli, i cili vrau 12 fëmijë dhe adoleshentë gjatë fundjavës.

Hezbollahu më herët të martën refuzoi të konfirmonte pretendimin e Izraelit se kishte vrarë Fuad Shukr, i përshkruar si “krahu i djathtë” i liderit të tyre, Hassan Nasrallah.

Forcat izraelite të Mbrojtjes (IDF) e fajësuan atë për një sulm të shtunën që la të vdekur 12 fëmijë dhe adoleshentë në Lartësitë e Golanit të pushtuara nga Izraeli, ndërkohë që Hezbollahu mohoi përfshirjen.

Deklarata e Hezbollahut për Shukr erdhi të mërkurën, duke thënë se Izraeli kishte sulmuar një ndërtesë banimi në periferi jugore të Bejrutit, një bastion i grupit, dhe se “një numër qytetarësh” ishin vrarë dhe të tjerë u plagosën.

Në deklaratë thuhej gjithashtu se Shukr “ishte i pranishëm në këtë ndërtesë në atë kohë”, por se grupi ishte ende në pritje të rezultateve përfundimtare për fatin e tij.

Ministria libaneze e Shëndetësisë tha se dy fëmijë dhe dy gra u vranë dhe 74 persona u plagosën në Bejrut.

Nëse vdekja e tij konfirmohet zyrtarisht, Shukr do të ishte komandanti më i lartë i Hezbollahut që është vrarë në përleshjet e fundit midis Izraelit dhe grupit militant të mbështetur nga Irani në Liban.

LEXONI GJITHASHTU:

• Kabineti i luftës i jep autorizimin Netanyahut të nis hakmarrjen ndaj Hezbollahut
• Frikë për përhapje të luftës, a mund të ketë një përplasje të re Izrael-Hezbollah?