‘Buxheti rrit taksat’, Tabaku: Rrugët e florinjta do mbushin arkën e oligarkëve

Projekt buxheti i propozuar nga qeveria në Parlament, për Partinë Demokratike do të përkeqësojë gjendjen ekonomike të shqiptarëve.

Deputetja Jorida Tabaku deklaroi sot se buxheti i propozuar për vitin 2023 nuk merr asnjë masë për të frenuar inflacionin dhe për të ndihmuar qytetarët nga rritja e çmimeve.

“Ky projektbuxhet i paraqitur nuk ka asnjë bazë reale, nuk i përgjigjet nevojave të krizës që ka prekur thellë sipërmarrjen dhe është larg pritshmërive që kanë sot qytetarët. Aq më tepër është larg rrugës se si duhet menaxhuar kjo krizë ekonomike që ka prekur xhepat dhe portofolin e shqiptarëve”, theksoi ajo.

Sipas Tabakut, edhe në buxhetin e vitit të ardhshëm, shqetësimi i vetëm i qeverisë është mbështetja e oligarkëve të cilëve nuk ua përmendi emrat.

“Vlera totale e koncesioneve dhe PPP-ve që do t’i shtohen listës së gjatë të parave që taksat e qytetarëve mbushin arkën dhe mbajnë gjallë bizneset e oligarkisë do të rritet me 1 mld dollarë. Rrugët e florinjta vazhdojnë të mbushin arkën e oligarkëve në kurriz të rritjes së taksave të shqiptarëve”, nënvizoi Tabaku.

LEXONI GJITHASHTU

• Buxheti për vitin 2023 do të jetë 5.4 mld euro

• Gjuetia ndaj biznesit ‘mashtrues’, sa humbet buxheti nga informaliteti me TVSH
• Buxheti 2023, Ibrahimaj: S’do ketë rritje të çmimit të energjisë për familjarët