Caktohet data e nisjes së gjykimit kundër Trumpit për ryshfet

Një gjykatës në Nju Jork (New York) ka caktuar nisjen e gjykimit ndaj ish-presidentit Donald Trump, më 15 prill, lidhur me rastin që ka të bëjë me pagimin e parave në këmbim të heshtjes të një ylli të pornografisë.

Gjykatësi Juan M.Merchan mori këtë vendim të hënën, më 25 mars. Gjykatësi më herët qortoi avokatët e ish-presidentit, pasi u ricaktua data e gjykimit, pasi paraprakisht ishte shtyrë nisja e gjyqit.

Merchan ka kundërshtuar atë që sugjeroi se ishin pretendime të pabaza të avokatëve të Trumpit për “sjellje të pahijshme të prokurorëve”, pasi ekipi mbrojtës i Trumpit kishte pretenduar se prokurorët deri vonë nuk bënë publike dhjetëra mijëra faqe të dhënash nga një hetim i mëhershëm federal.

Prokurorët thanë se vetëm një pjesë e vogël e të dhënave të reja janë të rëndësishme për çështjen, ndërkaq avokatët mbrojtës pretenduan se mijëra faqe janë potencialisht të rëndësishme, të cilat duhet të rishikohen.

Më herët gjatë këtij muaji, Merchan shtyu nisjen e gjykimit dhe u tha avokatëve që duhet të veprojnë më shpejtë nëse besojnë se nuk kanë të gjitha materialet që besojnë se duhet të marrin nga prokurorët.

“Ju po e akuzoni zyrën e prokurorit të qarkut të Manhatanit dhe njerëzit e përfshirë në këtë çështje për sjellje jo të duhur prokuroriale dhe po tentoni të më përfshini dhe mua. Ju nuk keni asnjë provë për këtë”, tha ai.

I nominuari republikan për president të SHBA-së mori pjesë në seancën gjyqësore për caktimin e nisjes së gjyqit, që është rasti i parë nga katër raste penale ndaj tij që pritet të përfundojnë në gjykatore.

LEXONI GJITHASHTU:

• Dhëndri i Trumpit synon investime turistike në Shqipëri dhe Serbi
• Kreu i republikanëve në Senat mbështet kandidatin presidencial Donald Trump