Ceferin: Të shpëtojmë futbollin nga idiotët, synimi i sportit është bashkimi

Futbolli duhet të shpëtohet nga ata që e përdorin për qëllime personale, kjo ka qenë thirrja e kreut të UEFA-s Aleksandër Ceferin nga Tirana. Numri 1 i UEFAs vlerësoi infrastrukturën e futbollit në vendin tonë, duke dhënë idenë se në vijim mund të organizohen të tjera evente ndërkombëtare.

Kreu i UEFA-s Alexander Ceferin, legjenda e Portugalisë, Luis Figo, kreu i FSHF-së Armand Duka dhe të tjerë personalitete evropiane ishin të pranishëm në “Shtëpinë e Futbollit” në kryeqytet, nga ku dhanë mesazhe për lojën e bukur, por dhe motivuan të rinjtë e apasionuar.

Pas një lojë interesante futbolli që i argëtoi të pranishmit, numri 1 i qeverisë evropiane të futbollit, u tregua i ashpër me personat që e përdorin futbollin për arsye personale.

“Mesazhi im është që futbolli dhe sporti duhet të bashkojnë popullin jo ta ndajnë atë. Duhet të shpëtojmë nga idiotët të cilët përdorin ndeshjet e futbollit për ideologjitë e tyre idiote, në të gjitha vendet. Ata nuk e duan futbollin, duan veten dhe e përdorin futbollin për të promovuar idetë e tyre idiote”, tha Aleksandër Ceferin, President i UEFA-s.

Më tej Ceferin ka folur për projektet e reja në bashkëpunim me FSHF.

“Do flasim me presidentin e FSHF-së për këtë gjë, infrastruktura juaj është e mirë, sidomos stadiumi kombëtar. Për momentin do të ishte jo korrekte të deklaroja dicka rreth kësaj”.

Presidenti FSHF-së ka vlerësuar vendimin e UEFA-s që mbledhja e radhës e komitetit ekzekutiv të mbahet në Tiranë.

“Ky është vlerësim për komunitetin e futbollit shqiptar, vlerësim për bashkëpunimin mes dy institucioneve dhe respekt i punës së komitetit të futbollit shqiptar. Nuk është thjesht mbledhje, por event që përfshin dhe aktivitetin e sotëm, që do mbetet gjatë në memorjen e fëmijëve”, theksoi Armand Duka, President i FSHF-së.

Një mesazh motivues për të rinjTë dha dhe legjenda Luis Figo.

“Gjëja më e rëndësishme jo vetëm në sport, por edhe në jetë është që të punosh fort, të ndjekësh ëndrrën dhe me këta dy ingredientë mund të arrish objektivat”, shtoi Luis Figo, ish-futbollist i Portugalisë.

Kujtojmë që Shqipëria është një ndër pak vende të cilat kanë pritur një mbledhje të Komitetit Ekzekutiv të qeverisë evropiane të futbollit.