Celibashi merr zyrtarisht detyrën e kryekomisionerit të zgjedhjeve: Sfidë kryesore, teknologjia e informacionit

Klement Zguri i dorëzoi sot detyrën kryetarit të ri të Komisionit Qendror të Zgjedhjeve, Ilirjan Celibashi.

Në një fjalë të shkurtër para mediave, kryekomisioneri i ri tha se veprimtaria e tij në krye të institucionit do të karakterizohet nga integriteti, paanësia, profesionalizmi dhe transparenca.

Z. Celibashi nënvijëzoi se një nga sfidat më të mëdha mbetet teknologjia e informacionit në zgjedhje, ndërsa kërkoi bashkëpunim të ngushtë të medias me KQZ në procesin zgjedhor.

“Gjej rastin të inkurajoj median për bashkëpunim sa më të hapur me KQZ dhe me mua si kryekomisioner. Ky bashkëpunim është një interes të qytetarëve dhe procesit politik.  Sfida kryesore mbetet çështja e teknologjisë së informacionit.

Ne do të bëjmë çdo përpjekje për një qasje sa më të mirë, në kuptim të mundësive për ta realizuar procesin. Po koha ka bërë që edhe aspekte të tjera të procesit zgjedhor të jenë po kaq të rëndësishme”, tha z. Celibashi.

Në ceremoninë e dorëzimit të detyrës nga Zguri te Celibashi e pranishme ishte edhe zëvendëskomisionerja Lealba Pelingu. Celibashi u zgjodh të hënën nga Kuvendi me 106 vota si drejtuesi i ri i KQZ-së.

Lexoni gjithashtu:

Ilirjan Celibashi, figura konsensuale në krye të KQZ-së

Parlamenti miraton KQZ-në e re, Ilirjan Celibashi zgjidhet kryetar