Celibashi: Votimi do të bëhet me identifikim biometrik, vlefshmëria e kartave do të shtyhet

Komisioneri Shtetëror i Zgjedhjeve, Ilirjan Celibashi thotë se nuk ka një rregullim ligjor për të garantuar dhe mundësuar votën e diasporës. Z. Celibashi foli për mos besim mes forcave politike por edhe për mungesën e ligjit që rregullon pjesëmarrjen e diasporës në votim.

“Kam frikë se për këto zgjedhje nuk do të jetë e mundur për diasporën që të votojnë. Ne jemi ngelur akoma tek akti i parë i grumbullit të akteve që KQZ do të duhet të miratojë. Ia kanë lënë topi KQZ, por i kanë thënë që OK do të hysh në fushë por nuk ke as portën dhe as topin. Diaspora do të jetë në listën e zgjedhësve por do të duhet të vijnë këtu”, tha ai.

Komisioneri Shtetëror i Zgjedhjeve nga ana tjetër u shpreh në zgjedhjet e 25 prillit do të jetë i garantuar funksionimi i identifikimit biometrik të të gjithë votuesve.

“Në të gjithë testet që kemi bërë nuk kemi evidentuar deri tani asnjë lloj problematike”, u shpreh z. Celibashi duke iu referuar testimeve në Tiranë, Kukës dhe Vlorë.

Z. Celibashi tha se personat që u ka skaduar dokumenti i identifikimit do të kenë mundësi që të votojnë pasi qeveria shumë shpejt do të miratojë Aktin Normativ që do të shtyjë vlefshmërinë e tyre deri në fund të prillit.

“Do të shtyhet vlefshmëria e dokumenteve deri në fund të prillit. I kemi bërë një kërkesë zyrtare qeverisë dhe në dijeninë time qeveria është duke përgatitur një akt normativ. Jam 100% i sigurt që do të funksionojë identifikimi biometrik.