”Cenim i lirive politike”, opozita kundërshton lirimin e zyrave të FRD-së

Opozita ka dënuar veprimet e sotme të Policisë Bashkiake për lirimin e zyrave të partisë Fryma e Re Demokratike, pas vendimit të Bashkisë Tiranë.

Nënkryetari i Lëvizjes Socialiste për Integrim, Petrit Vasili, vendimin për lirimin e zyrave të FRD-së e ka quajtur një cenim të lirive politike.

“Nuk fshihen dot nga halli i tmerrshëm i humbjes, nga halli i dhënies hesap, këtu janë liritë të cenuara, të prekura. Është një liri politike e vendosur në Kushtetutën e Shqipërisë dhe këtyre lirive u bëjmë shërbim që të gjithë. Nuk është prekur FRD-ja, është prekur liria politike”, u shpreh Vasili gjatë një daljeje për mediat.

Ndërkohë, kryetari i FRD-së, Sali Shehu u shpreh se situata e sotme nuk ka ndodhur asnjë kohën e Enver Hoxhës.

Ai shtoi se “zyrat e FRD-së dhe nuk do i marrë askush”.

Ndërsa, Partia Demokratike gjithë ngjarjen e ka quajtur një akt brutal të urdhëruar nga Edi Rama.

Sipas PD-së “përdorimi i forcës policore kundër një partie politike është treguesi më domethënës se Edi Rama është kundërshtar i lirisë dhe i demokracisë”.

“Vendimi për të nxjerrë FRD-në nga selia për arsyen e vetme se doli në opozitë dhe iu bashkua koalicionit të PD-së provon se Edi Rama është një politikan hakmarrës dhe i rrezikshëm për demokracinë dhe për qytetarët”, thuhet në reagimin e selisë blu.

Demokratët theksojnë se “në 25 prill, pushteti autoritarist i Ramës, shteti i tij policor do të marrë fund”.

Këto reagime erdhën pasi mesditën e sotme, presidenti Ilir Meta u përplas me policinë bashkiake pas kërkesës së Bashkisë Tiranë për lirimin e zyrave të partisë FRD në rrugën Abdi Toptani në Tiranë.

Presidenti e cilësoi bllokimin e zyrave të partisë si “dhunë ndaj forcave opozitare dhe përpjekje për grusht shteti”.