Çfarë dihet nga sulmi i parë me raketa amerikane në territorin rus

Ushtria ukrainase kanë kryer sulmin e parë ndaj Rusisë duke përdorur raketa amerikane, pas marrjes së autorizimit nga Uashingtoni.

Lajmin e bëjnë të ditur gjithsesi burime jozyrtare ruse, sipas të cilave objektivi i goditur ka qenë një sistem mbrojtjeje anti-ajrore në rajonin kufitar të Belgorodit.

Sipas kanalit ushtarak rus në rrjetin Telegram, “DVA Majora”, që numëron mbi 700 mijë abonentë, raketat amerikane të tipit “Himars” ranë në një bazë që mbante raketa “S-300” dhe “S-400”.

I njëjti burim ka shtuar se në radhët e ushtarëve rusë nuk ka pasur viktima. Gjithashtu, kanali ka postuar edhe disa fotografi ku shfaqen disa mjete ushtarake në flakë dhe një kolonë tymi të ngrihet drejt qiellit.

Edhe një tjetër kanal rus, “Astra”, ka shkruar se sulmi ka dëmtuar një bazë për trupat dhe një tjetër që shërbente si depo për armët e rënda në distriktin Koroçanski, sërish në Belgorod.

Bëhet fjalë gjithsesi për lajme të pakonfirmuara si nga autoritetet në Moskë edhe nga ato në Kiev. Por më herët guvernatori i Belgorodit kishte deklaruar se të hënën një person kishte vdekur dhe 3 ishin plagosur nga shpërthimi në një depo municionesh pikërisht në distriktin e Koroçanskit, por pa saktësuar shkaqet.

Lajmi për sulmin ka ardhur pas paralajmërimit që Moska zyrtare i bëri Uashingtonit, që të mos kryente “gabime fatale” në Ukrainë.

“Shtetet e Bashkuara mund të bëjnë gabime që mund të kenë pasoja fatale. Nëse nuk bën asgjë për të ndalur aksionet provokuese të shërbëtorëve të saj, Amerika do të paguajë patjetër një çmim”, ka thënë zëvendës ministri i Jashtëm, Serghei Ryabkov.

LEXONI GJITHASHTU:

• SHBA lejon Ukrainën të godasë disa objektiva në Rusi me armatime amerikane
• Kremlini: Ukraina po përpiqet të godasë brenda Rusisë me armë amerikane