Çfarë do të thotë nëse Britania njeh Palestinën?

Deklarata e kryeministrit britanik për njohjen e Palestinës ka shkaktuar shumë reagime në arenën ndërkombëtare. Por kryeministri Kei Starmer tha se Britania do ta njohë Palestinën në Asamblenë e Përgjithshme të OKB-së në shtator, nëse Izraeli nuk ndërmerr hapa të rëndësishëm për të, përfunduar “situatën e tmerrshme” në Gaza duke lejuar më shumë ndihma humanitare.

Ky vendim pason Francën, e cila gjithashtu njoftoi planet për njohjen e Palestinës, dhe vjen si reagim ndaj vuajtjeve në Gaza gjatë luftës kundër Hamasit. Shumë anëtarë të partisë së tij i kanë kërkuar Starmer–it ta ndërmarrë këtë hap për të ushtruar presion ndaj Izraelit. Administrata Trump, përfshirë Sekretarin e Shtetit Marco Rubio, e ka refuzuar planin, duke e quajtur “të rrezikshëm” dhe në favor të Hamasit.Ministri i Jashtëm francez e ka përshëndetur vendimin britanik si një hap të përbashkët drejt paqes dhe përfundimit të dhunës.

Starmer, i cili fillimisht mbështeti plotësisht të drejtën e Izraelit për vetëmbrojtje, pas marrjes së detyrës ka adoptuar një qëndrim më kritik ndaj politikave izraelite. Britania ka pezulluar disa shitje armësh për Izraelin dhe ka sanksionuar dy ministra izraelitë të ekstremit të djathtë, të akuzuar për nxitje të dhunës ndaj palestinezëve.Irlanda, Norvegjia dhe Spanja njohën Palestinën vitin e kaluar me kufijtë para vitit 1967, duke pranuar se këta kufij mund të ndryshohen me marrëveshje.

Vendimi i Starmer–it mund të ushtrojë presion ndaj vendeve si Gjermania, Australia, Kanadaja dhe Japonia. Gjermania aktualisht nuk planifikon njohjen e menjëhershme të Palestinës, duke preferuar përparimin drejt një zgjidhjeje me dy shtete. Ndërkohë, Italia kërkon që njohja e Palestinës të shoqërohet me njohjen e Izraelit nga ana palestineze.

 LEXONI GJITHASHTU:

• Çfarë tregoi stërvitja ushtarake mes Serbisë dhe Kinës?

• Osmani: Administrata Trump e vazhdon programin e MCC-së në Kosovë