Çfarë do t’i ofrojë Trump-Putin, The Telegraph: Akses tek burimet minerare në Alaskë

Presidenti amerikan Donald Trump është gati t’i paraqesë homologut Vladimir Putin një propozim që përfshin koncesione të shumta ekonomike për Rusinë, në këmbim të paqes në Ukrainë.

Mes stimujve pritet të jetë aksesi tek burimet natyrore të Alaskës, tek mineralet e rralla ukrainase dhe heqja e disa prej sanksioneve ndaj industrisë ajrore të Rusisë, bën të ditur gazeta britanike “The Telegraph”.

Sekretari amerikan i Thesarit, Scott Bessent dhe zyrtarë të tjerë të administratës po punojnë ngushtë me Trump për të finalizuar propozimet në prag të samitit.

Në prill, Kievi dhe Uashingtoni nënshkruan një marrëveshje që i jep Shteteve të Bashkuara akses tek mineralet ukrainase. Sipas Shkollës Ekonomike në Kiev, Ukraina zotëron një të tretën e rezervave evropiane të litiumit dhe 3 për qind të stokut global.

Dy nga depozitat më të mëdha të litiumit ndodhen në territoret e kontrolluara nga rusët dhe presidenti Putin nuk ka ndërmend t’i lëshojë ato.

Ndërkohë, qytetarët në Kiev janë shprehur skeptikë mbi mundësinë që samiti mes Trump dhe Putin do t’i japë fund luftës.

Trump ka kërcënuar me “pasoja shumë serioze” nëse Putin nuk bie dakord të ndalë konfliktin, edhe pse nuk ka saktësuar se cilat mund të jenë pasojat në fjalë.

Ndërkohë, presidenti Zelensky ka ngulmuar vazhdimisht që çdo akord paqeje të përfshijë garanci të forta për sigurinë e Ukrainës, për ta mbrojtur atë nga agresione të tjera të Rusisë.

LEXONI GJITHASHTU:

• Kremlini publikon detaje nga samiti, si do të zhvillohen negociatat Trump–Putin
• Deklaratat për Epstein, Melania Trump kërcënon me padi 1 miliard $ djalin e Biden