Çfarë po ndodh me trupin e Navalnyt, familja kritika Putinit: Po zhduken provat

E veja e opozitarit rus Alexei Navalny, Yulia, u zotua se do të vazhdojë punën e të shoqit dhe mori pjesë në bisedimet me ministrat e Jashtëm të BE-së në Bruksel, për të diskutuar se si ta mbajë Rusinë përgjegjëse për vdekjen. Ajo u prit nga Përfaqësuesi i Lartë, Josep Borrell, i cili shprehu opinionin e tij sa i takon përgjegjësve.

“Në mes të takimit ne pritëm Yulia Navalnayan. Ne bëmë homazhe në nder të Alexei Navalnyt, i cili, sikurse e dini, u vra në një burg rus nga regjimi i Putin. Mendoj se fjalët e duhura janë këto: i vrarë me ngadalë në një burg rus nga regjimi i Putin”, deklaroi Josep Borrell, Përfaqësues i Lartë i BE-së.

Më herët, Yulia Navalnaya kishte shmangur angazhimin politik, por në një video të regjistruar jashtë Rusisë, ajo tha se do të vazhdojë punën e nisur nga bashkëshorti për ta ndryshuar Rusinë.

Ndërkohë, e ëma e Navalny ka shkuar në koloninë penale të Arktikut ku djali i saj ndërroi jetë. Mësohet se trupi i tij nuk do t’i dorëzohet familjes përpara dy javëve. Për Yulia Navalnaya, kjo është një përpjekje për të zhdukur gjurmët e substancës nervore, që sipas saj është shkaku i vdekjes. Ndërkohë, Kremlini ka refuzuar thirrjen për një hetim ndërkombëtar.

Homazhe të shumta në nder të aktivistit po mbahen në kryeqytetet evropianë. Në Romë për shembull u ndezën qirinj në një ceremoni përkujtimore ku morën pjesë disa qindra qytetarë, që shprehën zemërimin e tyre.

LEXONI GJITHASHTU:

• Çfarë shkruante Navalny për Donald Trump në letrat e tij të fundit
• BE-ja bën thirrje për një hetim ndërkombëtar të vdekjes së Navalnyt
• Autoritetet ruse nuk lejojnë nënën e Navalny të marrë trupin e djalit të saj