Sytë e botës së futbollit janë drejt Bernabeut, vëmendja e të gjithëve do të kyçet në derbin e Madridit, aty ku Reali dhe Atletico duelojnë me njëri-tjetrin, por këtë herë në arenën e Champions. Emocionet e kompeticionit më të lakmuar rikthehen sot me 4 ndeshje tejet interesante, ku në fushë zbresin edhe ekipe si Aston Villa, Arsenal dhe Dortmund. Padyshim, shikuesit janë me sytë drejt Los Blancos dhe Colchoneros, të betuar për të mposhtur njëri-tjetrin dhe me besimin se ka ardhur koha për një tjetër trofe në Evropë.
Bernabeu do të jetë i tejmbushur dhe për këtë nuk ka asnjë dyshim, ku Carlo Ancelotti duhet të zgjedhë kartat e tij fituese, ashtu si Simeone në anën tjetër. Bellingham është mungesa e madhe për shkak kartonësh, por edhe Carvajal, Militao dhe Ceballos nuk luajnë për shkak dëmtimi. Në anën tjetër, Azpilicueta dhe Koke nuk janë gati për teknikun argjentinas.
Kjo është përballja e 10-të në Champions mes Realit dhe Atletikos, 5 fitore për galaktikët, 2 barazime dhe 2 herë peshorja ka anuar për bardhekuqtë. PSV, pasi eliminoi Juventusin, beson te suksesi ndaj Arsenalit, ku dy skuadrat përballen në Holandë, ndërsa Dortmund pret në shtëpi Lille. Club Brugge-Aston Villa është ndeshja e parë e mbrëmjes, teksa faza e 1/16 luhet me sistem vajtje-ardhje.
