Champions | Porto sfidon Interin në ‘Meazza’, Manchester City udhëton drejt Leipzig

Interi do të kërkojë kualifikimin për në fazën tjetër të Ligës së Kampionëve, ndërsa mbrëmjen e së mërkurës pret në shtëpi Porton. Kjo është hera e pestë që këto skuadra ndeshen me njëra-tjetrën, ndërsa më para 2 fitore janë marrë nga Interi, 1 barazim dhe 1 triumf i takon portugezëve.

Përgatitjet tek të dyja skuadrat kanë marrë fund, ndërsa skuadra e Portos ka mbërritur në Milano. Dëmtimet mbeten një problem për miqtë, teksa në total janë 7 lojtarë që mund t’i mungojnë përballjes.

Tek zikaltrit gjendja është më e qetë, ndërsa Korrea nuk do të jetë pjesë e sfidës. Sa i përket formacionit nuk priten shumë ndryshime, ku sulmi pritet t’i besohet dyshes Lautaro-Xheko.

Një tjetër përballje interesante është dhe ajo që luhet në Gjermani, mes Lajpcigut dhe Mançester Sitit. Dy skuadra të cilat janë përballur me njëra-tjetrën në Çempions edhe në vitin 2021, aty ku anglezët kaluan lehtësisht në fazën tjetër.

Tashmë 2 vite më pas nuk ka shumë ndryshime në organikën e skuadrave, teksa vlen të përmendet që ka disa mungesa të cilat do t’i prishin punë secilit teknik.