CIA: Putin mund të jetë në kërkim të hakmarrjes ndaj Prigozhinit

Agjencia Qendrore e Inteligjencës (CIA) në Shtetet e Bashkuara, ka thënë se presidenti rus, Vladimir Putin është duke tentuar të blejë kohë derisa të marrë vendim se çfarë të bëjë me Yevgeny Prigozhinin.

Prigozhin është udhëheqës i grupit mercenar rus Wagner, i cili nisi një rebelim dyditor në Rusi muajin e kaluar.

Shefi i CIA-s, Wiliam Burns, ka thënë se rebelimi e ka vënë në pah dobësinë e pushtetit që e ka ndërtuar Putini.

Ai ka thënë në Forumin e Aspenit për Siguri se, lideri rus mund të jetë ende duke kërkuar hakmarrje kundër Prigozhinit.

“Çfarë po shohim ne tani është një lojë shumë e komplikuar” ka thënë shefi i CIA-s të enjten.

Kur është pyetur për videon e fundit, në të cilën Prigozhini shihet në Bjellorusi, shefi i CIA-s ka thënë se udhëheqësi i Wagnerit ka qenë së fundi edhe në Minsk, por edhe në Rusi.

Ai ka thënë Wagneri është ende i rëndësishëm për udhëheqësinë e Rusisë në Afrikë, Libi dhe Siri, prandaj ka mundësi që Putini po synon ta ndajë grupin nga lideri.