Cilat janë dy shtetet që janë ofruar të presin takimin Trump-Putin

Zvicra dhe Serbia kanë shprehur gatishmërinë e tyre për të pritur një takim të mundshëm ndërmjet Presidentit të zgjedhur të SHBA-së, Donald Trump, dhe Presidentit rus Vladimir Putin. Këto oferta vijnë ndërkohë që Trump po përpiqet të bindë Putin-in për të përfunduar luftën e tij në Ukrainë.

Trump, i cili do të marrë detyrën e Presidentit të SHBA-së të hënën që vjen, konfirmoi javën e kaluar se ekipi i tij po punon për të caktuar një takim me Putin, duke synuar të përmbushë premtimin për të përfunduar sa më shpejt luftën në Ukrainë.

Ministria e Jashtme e Zvicrës tha të dielën se tashmë kishte shprehur gatishmërinë e saj për të pritur bisedimet e paqes. Megjithatë, një pengesë mund të jetë një urdhër arresti i lëshuar nga Gjykata Ndërkombëtare Penale për Putinin, lidhur me akuzat për deportimin e paligjshëm të fëmijëve ukrainas në Rusi. Pavarësisht se Zvicra është e detyruar ligjërisht ta arrestojë Putinin, Nicolas Bideau, kreu i komunikimit në Ministrinë e Jashtme të Zvicrës, sqaroi se autoritetet zvicerane mund të bëjnë përjashtime në rastin e bisedimeve për paqe.

Ndërkohë, Presidenti i Serbisë, Aleksandar Vuçiç, gjithashtu është vetëofruar për të pritur takimin në Serbi, duke e përshkruar Beogradin si një vend “shumë të përshtatshëm” për një takim të tillë. Vuçiç theksoi se Trump dhe Putin gëzojnë popullaritet të madh në Serbi. Në një intervistë për RTS-në, Vuçiç tha: “Nuk ka asnjë vend që mund të krahasohet me Serbinë në nivelin e mbështetjes për Presidentin Trump.” Ai gjithashtu shtoi se Serbia mbetet neutrale në konfliktin mes Rusisë dhe Perëndimit dhe nuk është anëtare e aleancave ushtarake si NATO.

Trump ka deklaruar së fundmi se “Putin dëshiron të takohet,” ndërsa Kremlini ka konfirmuar se është i hapur për bisedime. Këshilltari i Trump për Sigurinë Kombëtare, Mike Ëaltz, ka konfirmuar se “po përgatiten për takimin” ndërmjet Trumpit dhe Putin-it, megjithëse formati i takimit, përfshirë mundësinë e pjesëmarrjes së Presidentit ukrainas Volodymyr Zelensky, nuk është përcaktuar ende. Ëaltz theksoi gjithashtu se një telefonatë ndërmjet Trumpit dhe Putin-it mund të zhvillohet “në ditët dhe javët e ardhshme.”

Trump, i cili ka qenë kritik ndaj ndihmës amerikane për Ukrainën, ka shkaktuar shqetësime mes zyrtarëve ukrainas dhe aleatëve për të ardhmen e mbështetjes amerikane. Administrata në ikje e Biden vazhdon të ofrojë ndihmë ushtarake, përfshirë një paketë me armë në vlerë 500 milionë dollarë, e cila synon forcimin e pozicionit të Ukrainës për bisedimet e mundshme të paqes.

LEXONI GJITHASHTU:

• Flet i dërguari special për Ukrainën: Trump nuk po përpiqet t’i japë diçka Putinit
• Trump: Po organizohet një takim me Putinin