Collina: Vendimet ndaj Egjiptit ishin të drejta, gjyqtarët nuk ndikohen nga presidenti i FIFA

Shefi i arbitrazhit të FIFA-s, Pierluigi Collina ka kritikuar pretendimet se gjyqtarët e ndeshjes mund të ndikohen nga faktorë të jashtëm, pas akuzave se ata janë të anshëm në favor të Argjentinës.

Komentet e tij erdhën pasi trajneri i Egjiptit, Hossam Hassan, kritikoi arbitrin Francois Letesier dhe tha se ekipi i tij u “trajtua padrejtësisht” gjatë humbjes së tyre në raundin e 1/8-ave nga Argjentina të martën.

Megjithatë, Collina, ish -arbitri i finales së Kupës së Botës që iu bashkua FIFA-s në vitin 2017, e ka hedhur poshtë me forcë idenë se gjyqtarët e saj tregojnë favorizim ndaj Argjentinës ose ndonjë ekipi tjetër. “Askush nuk mund të pretendojë se arbitrimi i FIFA-s mund të ndikohet nga kushdo, madje as nga presidenti i FIFA-s (Gianni Infantino)”, tha Collina nëpërmjet faqes së internetit të FIFA-s.

“Gianni Infantino gjithmonë ka treguar mbështetjen e tij të plotë për ‘Ekipin e Parë të FIFA-s’ (niveli më i lartë i gjyqtarëve), ndërsa na beson se do të punojmë me pavarësi të plotë. Arbitrat marrin vendime të ndershme dhe, ashtu si lojtarët dhe trajnerët, gjithmonë përpiqen të bëjnë më të mirën.”

“Sigurisht, diskutimi konstruktiv rreth vendimeve do të jetë gjithmonë pjesë e futbollit, por akuzat e pabaza nuk kanë vend në sportin tonë.

Askush nuk mund të vërë në dyshim integritetin e gjyqtarëve të Kupës së Botës FIFA. Kur kjo ndodh, mund të provokohen reagime që çojnë në kërcënime kundër tyre dhe familjeve të tyre. Kjo nuk është e drejtë.”

Protestat e egjiptianëve u përqendruan kryesisht në anulimin e golit të Mustafa Zicos pasi ndërhyri gjyqtari i VAR, i cili vendosi që Marawan Attiyah kishte fauluar Lisandro Martinez para përfundimit të ndeshjes.

“Nëse zbulohet një faull në fazën përgatitore dhe gjykohet se ka pasur ndikim në gol, VAR do të rekomandojë një shqyrtim në fushë”, shtoi Collina. “Nuk ka asnjë kufi të caktuar as për distancën nga porta dhe as për kohën midis incidentit dhe golit.

Ne besojmë se një faull është një faull. Pavarësisht nëse faulli duket ‘i qartë’, nëse gjyqtari nuk e ka parë atë në fushë, VAR mund të ndërhyjë”.