COVID-19 shkakton fluks pacientësh në Kosovë, mbi 800 të shtruar në spitale

Autoritetet shëndetësore në Kosovë njoftuan me shqetësim të shtunën se situata me pandeminë ka bërë që të paktën 837 persona t’u drejtohen spitaleve.

Sipas një njoftimi nga Shërbimi Spitalor Klinik dhe Universitar i Kosovës, 700 nga 837 të shtruarit janë të konfirmuar si të infektuar nga COVID-19.

“137 pacientë janë të dyshuar, në pritje të rezultateve, 30 pacientë janë në gjendje të rënduar shëndetësore, 636 janë nën asistim të okisgjeno-terapisë,” – u tha në njoftimin e QKUK-së.

Në QKUK aktualisht janë të shtruar 335 pacientë, 10 prej të cilëve në gjendje të rënduar.

Pjesa tjetër prej 502 pacientësh janë në 7 spitalet e përgjithshme rajonale – Prizren (123 pacientë); Pejë (111 pacientë); Gjakovë (88 pacientë); Gjilan (66 pacientë); Ferizaj (59 pacientë); Mitrovicë (33 pacientë) dhe Vushtri (22 pacientë).

Autoritetet raportuan ditën e sotme për 11 viktima të tjera mes pacientëve me COVID-19, teksa 873 persona rezultuan gjithashtu pozitivë.

Prej nisjes së pandemisë në Kosovë janë diagnostikuar 87,067 raste me COVID-19, prej të cilave 82.5% (71,813 raste) janë shëruar, 15.4% (13,424 raste) mbeten ende me mbartje të virusit, ndërsa 2.1% (1,830 raste) janë mbyllur me pasojë vdekjen.