Dalin pamjet/ Si ndodhi konflikti me grushte në Fresk, të pranishëm edhe dy policë

Euronews Albania ka siguruar pamjet e konfliktit me grushte që ndodhi paraditen e së martës në zonën e Freskut në Tiranë.

Në video shihen dy persona të veshur me rroba të zeza, të cilët godasin me grushte një person me bluzë të bardhë.

Në momentin e ngjarjes aty ndodhen edhe dy efektivë policie, të cilët përpiqen të ndërhyjnë për të ndalur përplasjen.

Në lidhje me këtë ngjarje, ka reaguar Policia e Tiranës, e cila bën me dije se ka shpallur në kërkim 27-vjeçarin Sindi Allushi.

Ndërkohë, në gjendje të lirë janë proceduar kushëriri i tij, 33-vjeçari P.A., si dhe babai i Sindit, Saimir Allushi, 52 vjeç, i cili mban funksionin e administratorit të Njësisë Nr. 12 në kryeqytet.

Sipas njoftimit zyrtar të Policisë, konflikti dyshohet të ketë ndodhur për motive pronësie. Sindi Allushi dhe kushëriri i tij dyshohet se kanë goditur me grushte shtetasin D.K., ndërsa Saimir Allushi akuzohet se e ka kanosur këtë të fundit nëpërmjet telefonit.

Policia vijon punën për kapjen e Sindi Allushit, si dhe për gjetjen dhe bllokimin e automjetit me të cilin ai është larguar nga vendngjarja.

Për këtë rast, Drejtori i Drejtorisë Vendore të Policisë Tiranë ka urdhëruar pezullimin nga detyra dhe nisjen e procedurave disiplinore ndaj punonjësit të policisë, inspektor P.M., për shkelje të rëndë dhe mosveprim.

LEXONI GJITHASHTU:

• EMRAT/ Goditet me grushte një person në “Fresk”, inspektori pezullohet për mosveprim
• VIDEO/ Dyshohet për grabitje me armë në një karburant në Elbasan, kapen 2 të rinjtë