Danimarka shteti i parë europian që heq të gjitha kufizimet anti-COVID

Danimarka bëhet  vendi i parë i Bashkimit Evropian që heq të gjitha kufizimet anti-COVID pavarësisht numrit të lartë të të infektuarve.

Nuk ka më maska, certifikata COVID apo mbyllje të bareve, restoranteve dhe klubeve. Në fuqi do të mbeten vetëm disa kufizime në kufij, për udhëtarët e pavaksinuar që vijnë nga vendet jashtë zonës Shengen.

Edhe në Britani maskat dhe dëshmia e COVID nuk janë më të detyrueshme në ambientet e brendshme.

Nga ana tjetër, Italia ka forcuar kufizimet për ata që nuk janë vaksinuar kundër COVID-19, duke nisur nga 1 shkurti.

Italianët do të duhet të tregojnë dëshmi  të vaksinimit ose shërimit për të hyrë në zyrat publike, banka, posta, librari  dhe qendra tregtare.

Pensionistët e pavaksinuar nuk do të jenë më në gjendje të marrin pensionet e tyre personalisht nga një zyrë postare. Vaksinimi për mbi 50-vjeçaret në shtetin fqinj është i detyrueshëm.

Nga kjo e martë edhe Austria bëhet shteti i parë evropian ku vaksinimi është i detyrueshëm për të gjithë personat mbi 18 vjeç, duke përjashtuar ata që kanë arsye të veçanta mjekësore, gratë shtatzëna, dhe ata që kanë pak kohë që e kanë kaluar virusin. Nëse nuk vaksinohen qytetarët gjobiten nga 600 në 3600 euro.

LEXONI GJITHASHTU:

Austria shteti i parë evropian me vaksinim të detyrueshëm për të gjithë

Lehtësohen masat anti-COVID në Europë