“Dasma e hatashme”, komedia e Robin Howdon në skenën e teatrit të Durrësit

Për dy net me radhë në teatrin e Durrësit u luajt “dasma më e suksesshme e vitit.”

“Një dasmë e hatashme”, komedia brtanike me autor Robin Howdon, erdhi në skenë nga Kiço Londo më aktuale se kurrë.

“Një komedi për frikën nga martesa, nga zgjedhja. Për frikën për familjen, për të ardhmen, të përziera me mjeshtëri nga autori dhe që fsheh në vetvete dëshirën për një jetë me njeriun e duhur”, tha Londo.

Një lojë personazhesh në skenë, por dhe “një lojë me rrezikun”, një sfidë për regjisorin dhe kastin e aktorëve.

“Komeditë janë pak më të vështira sesa dramat, sepse duhet të komunikosh vazhdimisht me publikun. Publiku ka shfaqjen e vet, do shfaqjen e vet, çlirimin e vet”, u shpreh regjisori.

Dhe publiku durrsak, që tejmbushi sallën e teatrit me të qeshura e duartrokitje, e dha vlerësimin e vet.

“Më të larta sesa i kishim herën e kaluar dhe ashtu janë, kemi një interesim të paparë. Nuk e di, na do publiku i Durrësit”, tha ai.

“Është një komedi me karaktere, me situata, ka ritëm dhe nëse janë këto shfaqja e ka arritur qëllimin”, u shpreh Londo.

Pas Durrësit, gjatë javës, “Një dasmë e hatashme” do të udhëtojë në Kavajë, Rrogozhinë, Peqin dhe Elbasan.

LEXONI GJITHASHTU:

• Ekspozita “Retrospektivë”: 1 vit nga humbja e Sali Shijakut
• Ekspozita e familjes Zorba në Muzeun e Dëshmisë dhe Kujtesës