Ekspozita e familjes Zorba në Muzeun e Dëshmisë dhe Kujtesës

Në muzeun e Dëshmisë dhe Kujtesës në Shkodër u shfaq për herë të parë ekspozita me materiale të arkivuara të veprimtarisë së Terezina dhe Zef Zorba, të shpallur heretikë nga regjimi komunist në Shkodër.

Vajza e familjes Zorba thotë se ky është një moment shumë i rëndësishëm dhe e vlerëson të atin si një shpirt i lirë që nuk u tjetërsua nga regjimi i kohës.

“Ai brenda vetes ka qenë një njeri i lirë, patjetër i lirë dhe me një dashuri të madhe për kulturën dhe për artin. Natyrisht nga rrethimi blozë që ka qenë jashtë nuk ka arritur të depërtojë brenda mureve të shtëpisë ku ai ka punuar në një heshtje gati gjysmë shekullore”, tha Lejla Zorba, vajza familjes Zorba

Nëpërmjet materialeve të përzgjedhura nga fondi privat i familjes Zorba, kjo ekspozitë ofron një pasqyrë të thellë të jetës dhe veprës së tyre intelektuale në Shkodër, e cila u luftua me forcë nga diktatura.

“Ekspozita përmban materiale të ndryshme, materiale fotografike, materiale historike, dorëshkrime të tij. Përmban të gjitha ato punë që Zefi ka realizuar kryesisht gjatë periudhës të burgut, që u arrestua në vitin 1946 për ngjarjet tashmë të mirënjohura të Postribës, pavarësisht se ai vetë dhe bashkëshortja e tij Terezina nuk kishin asnjë lidhje me ngjarjet e Postribës, por Postriba shërbeu pikërisht për diktaturën e sapo instaluar që të godiste ashpër kryesisht shtresën intelektuale qytetare të Shkodrës”, u shpreh Pjerin Mirdita, drejtues i Muzeut të Dëshmisë dhe Kujtesës.

Zef Zorba, shquhej si regjisor, përkthyes dhe poet. Përmes veprave të tij, ai ngrihet mbi diktaturën e kohës, duke lënë një ndikim të madh në letërsinë shqiptare të ndaluar. Drita e dijes dhe shpresës që ai sjell me tekstet e tij është një kujtim i rëndësishëm për pasardhësit në ditët e sotme.

LEXONI GJITHASHTU:

• Fotot e shtypit botëror në ekspozitën e Budapestit. Një këndvështrim i ri mbi botën
• Gazetari Ilir Paço hap ekspozitën e tij “Presioni i Lirisë”