Databaza me të dhëna nga e-Albania? Erion Veliaj: Alibi e kundërshtarëve për humbjen, PS s’punon me Excel

Kryetari i Bashkisë Tiranë, Erion Veliaj mohoi që baza e të dhënave të fushatës zgjedhore të Partisë Socialiste të ketë marrë të dhëna nga portali qeveritar e-Albania.

Veliaj i tha gazetares Ilva Tare se akuzat e ngritura “janë përpjekje për të krijuar alibi për humbjen” duke nënkuptuar këtu kundërshtarët e tij politikë.

“Çdo parti serioze, Partia Demokratike në Amerikë… Republikane, Laburistët, të gjitha partitë punojnë me databaza,” – u shpreh Veliaj.

“[Databaza e rrjedhur në media është e PS-së?] Jo! Sepse PS nuk punon me Excel,” – u përgjigj kryetari i Bashkisë Tiranë duke pretenduar se “ndryshe nga kundërshtarët, PS punon me programe në pararojë”.

I pyetur se përse në databazën e rrjedhur në media ka emra të personave të ashtuquajtur “patronazhistë”, Veliaj tha se “nuk i kishte parë emrat” për të thënë nëse “ata janë të PS-së”.

Më tej Veliaj pretendoi se të dhënat e kartës së identitetit nuk kanë se çfarë t’i duhen shtabeve elektorale dhe se të dhënat për prirjen e votës në databazën e PS-së janë mbledhur nga aktivistë në terren.