Debat në gjykatë për dosjen “Partizani”, Malltezi këshillohet për terminologjinë e përdorur ndaj prokurorëve

Jamarbër Malltezi nisi leximin e mbi 200 faqeve me prova dhe dokumentacion për të kundërshtuar akuzat për dosjen “Partizani”, ku debatoi me gjykatën për terminologjinë e përdorur ndaj prokurorëve.

Malltezi deklaroi se ka mbi 30 deklarime të rreme që përbëjnë edhe element penal nga ana e prokurorëve. Gjykata ndërhyri për termin e përdorur nga Malltezi, duke kërkuar që ai t’u drejtohej atyre vetëm me “prokuror”.

Malltezi u shpreh: “Po si t’ua them prokuror, ata janë prokurorë politikë që ngritën një akuzë politike.” Gjykata ndërhyri sërish: “Jo këtë gjuhë ndaj përfaqësuesve të akuzës, ata janë prokurorë.”

Malltezi vijoi: “Prokurorët politikë, e kam artikuluar edhe më parë, pse qenka sakrilegj. Po deshët, shtoni një akuzë të re për agjitacion e propagandë, se kemi të pushkatuar më parë.”

Ai paraqiti pretendime edhe mbi të shkuarën e prokurorit Arben Kraja si hetues i komunizmit dhe katapultimin sipas tij të Enkeleda Millonait në SPAK nga Taulant Balla. Millonai ndërhyri sipas kërkesës së gjykatës.

Millonai: “Kërkoi të tërhiqet vërejtja e të pandehurit, pasi të pandehur nuk janë prokurorët në këtë proces. Nëse ka pretendime, t’iu drejtohet organeve përkatëse. Të qëndrojë brenda atyre elementëve që përmban akuza.”