Një 28-vjeçare holandeze fizikisht e shëndetshme, ka vendosur t’i japë fund jetës së saj nëpërmjet eutanazisë për shkak të betejave të saj me depresionin, autizmin dhe çrregullimin e personalitetit.

Zoraya ter Beek, e cila jeton në një fshat të vogël në Holandë afër kufirit gjerman, është planifikuar të eutanizohet në maj, pavarësisht se është e dashuruar me të dashurin e saj 40-vjeçar dhe jeton me dy mace.

Ter Beek, e cila dikur aspironte të bëhej psikiatre, është përballur me probleme të shëndetit mendor gjatë gjithë jetës së saj. Ajo tha se vendosi të eutanizohej pasi mjekët i thanë: “Nuk mund të bëjmë asgjë më shumë për ty. Nuk do të bëhet kurrë më mirë”, sipas “the Free Press”. “Unë kam qenë gjithmonë shumë e qartë se nëse nuk përmirësohem, nuk mund të vazhdoj”, tha ter Beek.

Sipas procedurës, mjeku do japë një qetësues, i ndjekur nga një ilaç që do të ndalojë zemrën e Beek-ut. Kur ajo të jetë e vdekur, një komitet i shqyrtimit të eutanazisë do të vlerësojë vdekjen e saj për të siguruar që doktori t’i përmbahet “kritereve të kujdesit të duhur” dhe qeveria holandeze të deklarojë se jeta e Zoraya ter Beek-ut i ishte dhënë fund ligjërisht. Ajo i ka kërkuar të dashurit të saj që të jetë me të deri në fund.

Nuk do të ketë funeral. Ajo nuk ka shumë familjarë. Ajo nuk mendon se miqtë e saj do të kenë dëshirë të shkojnë. Në vend të kësaj, i dashuri i saj do të shpërndajë hirin e saj në “një vend të bukur në pyll” që ata kanë zgjedhur së bashku, tha ajo. “Kam pak frikë nga vdekja, sepse është e panjohura përfundimtare”, tha ajo. “Ne nuk e dimë vërtet se çfarë do të ndodhë më pas – apo nuk ka asgjë? Kjo është pjesa e frikshme”.

Më shumë njerëz po vendosin t’i japin fund jetës së tyre ndërsa vuajnë nga një sërë problemesh të tjera të shëndetit mendor si depresioni ose ankthi i përforcuar nga pasiguria ekonomike, ndryshimet klimatike, mediat sociale dhe çështje të tjera, raportoi Free Press.