“Defender Europe 25”, Starova: Pasiguria në Ballkan është rritur, duhet bashkëveprim

Në emisionin e sotëm të “Balkan Talks”, u diskutua mbi “Defender Europe 2025”, si një iniciativë direkte e ushtrisë amerikane me ato aleate të NATO-s.

Si një njohës i aleancës ushtarake, ish-ministri i Jashtëm i Shqipërisë, Arjan Starova e vlerëson si një arritje, kjo duke nisur që nga fakti se është më e madhja e mbajtur në këto vite, si dhe për nga serioziteti që ka NATO në përgatitjet e sigurisë.

“NATO gjithmonë përgatitet seriozisht për çështjet e saj të sigurisë dhe problemet e mëdha që ka. Problemi është se bota sot gjeopolitikisht është në një situatë shumë të vështirë. Kemi luftë në Lindjen e Mesme, kemi probleme me Iranin, me terroristët, kemi probleme në Ukrainë, kemi rreziqe që lidhen me aktorë të tjerë që janë jashtë Europës. Në këto kushte NATO duhet të rrisë aftësinë e saj bashkëvepruese pasi kjo është një nga elementët kyçe.

Dimensioni i paparashikueshmërisë së sigurisë është rritur. Flitet se edhe në Ballkan mund të ketë një gjë të pakontrolluar. Lufta në Ukrainë mund të ketë një zhvillim të paparashikuar. Prandaj kjo stërvitje është shumë e rëndësishme”, theksoi Arjan Starova.