Deklaruan parandalimin e ngjarjes kriminale, përgënjeshtrohet policia

Komisariati nr. 1 raportoi të enjten se parandaluan një ngjarje kriminale. Dy të rinj shkuan mëngjesin e të mërkurës në një hotel dhe u konfliktuan me pronarin e hotelit.

Gjatë konfliktit Ervin Selita, i njohur me nofken Vinz, pjesë e grupit Hellbanians (i njohur në Londër për trafik narkotikësh) ka qëlluar me armë xhamat e hotelit në orën 2:15.

Pas konfliktit policia shoqëroi në komisariat Selitën dhe dy të tjerë.

Në lajmërimin zyrtar, policia pretendon se parandaloi një tentativë për vrasje. Burime nga policia për Euronews Albania konfirmojnë se policia ka ndërhyrë pas përshkallëzimit të ngjarjes në ambientet e jashtme të hotelit.

Kamerat e sigurisë dëshmojnë se ai ka qëlluar me armë zjarri dhe ka dëmtuar fasadën e jashtme. Në vendngjarje janë gjetur 6 gëzhoja. Selita u arrestua mesditën e të mërkurës.

Në konflikt janë përfshirë Xhuljano Selita dhe Erjon Mici, të afërmit e tij. Të dy janë shpallur në kërkim. Njëri nga ta ka marrë me vete armën e krimit, provë kyçe për vijimin e hetimit.