Dëmshpërblim për banesat e ‘Astirit’, Basha: Do t’i japim fund konfliktit politik

Lideri i demokratëve, Lulzim Basha u takua me banorët e ‘Astirit’, të cilëve u premtoi mbështetje reale pas 25 prillit. Basha tha se do t’i përmbahet premtimit të tij për dëmshpërblimin e banesave të shembura.

“Do t’i qëndroj pikën për pikë marrëveshjes me të gjitha familjet e cenuara nga afera korruptive e Unazës së Re. Paratë që do paguhen me vlerën e tregut për pronat e prishura me padrejtësi, si çdo dëm tjetër i shkaktuar nga qeveria Rama”, u shpreh kreu i PD.

Gjatë një takim me një grup të rinjsh në këtë zonë, Basha i njohu ata me planin e opozitës për arsimin.

“Aleanca Evropiane e Universiteteve do të na ndihmojë të kemi 20 kualifikime të ndryshme online për të të rinjtë”,  tha kryedemokrati.

Kryedemokrati u zotua se pas 25 prillit, do ti japë fund konfliktit politik, dhe do ti kthejë politikës fytyrën njerëzore.

“Detyrat do t’i kryejmë pa qenë orë e minutë në shtëpitë tuaja, në televizionet tuaja, në Facebook, ndaj do t’i japim fund politikës konfliktuale që ka për qëllim të fshehë dështimet e qeverisje 8-vjeçare të Ramës”, u shpreh z. Basha.