Denar Biba: Gjoba nga Konkurrenca për bizneset mund të rriste çmimin e bukës

Denar Biba, drejtues i Autoritetit të Konkurrencës tha se nëse bizneset do ishin gjobitur në shtator të vitit të kaluar bëhej fjalë për 5 milionë euro.

Rritja e çmimit të bukës kaloi vetëm me një vërejtje dhe bizneset nuk u gjobitën. Sipas Bibës nëse gjoba do vendosej jo vetëm që çmimi i bukës nuk do ulej, por do rritej.

“Hipoteza më e mençur është se me gjasë do rritej çmimi sepse diku do shkarkohej,” – tha Biba.

Drejtuesi i Autoritetit të Konkurrencës bëri thirrje për rritje të përgjegjësisë.

“Ne nuk i kemi armiq bizneset,” – u shpreh ai, ndërsa theksoi se bizneset janë kuajt e karrocës që tërheqin sistemin ekonomik ku jetojmë.

Formula e gjobës është 0-10% të xhiros së vitit të kaluar. Biba tregoi se gjoba është shumë e konsiderueshme dhe ndonjë biznes mund ta nxjerrë nga tregu.

Ditën e djeshme AK është mbledhur me PD-në në Komisionin e Ekonomisë për të dëgjuar nevojat e institucionit, që sipas Bibës i kërkohet shumë, por i jepet pak.

Çfarë u vu re ishte se nismëtarja e dëgjesës, Jorida Tabaku, vonoi për të shkuar në mbledhje dhe u largua më herët.

“Nuk i dëgjoi të gjitha por jam i bindur jeta parlamentare është dinamike,” – komentoi drejtuesi i Konkurrencës.

LEXONI GJITHASHTU:

• Furrat nuk afishojnë çmimin e bukës dhe peshën