Dënim deri në 20 vie burg, zbardhen 4 akuzat ndaj Trump për kryengritjen e 6 janarit

Donald Trump është akuzuar nga Departamenti amerikan i Drejtësisë për përpjekjet e tij për të përmbysur rezultatin e zgjedhjeve presidenciale të 2020-s.

Katër akuzat përfshijnë “komplot për mashtrim të qeverisë së Shteteve të Bashkuara” dhe “pengim të dëshmitarëve”.

Bëhet fjalë për padinë e tretë të ngritur ndaj ish-presidentit, që kërkon një mandat të dytë në Shtëpinë e Bardhë.

Dosja e padisë përmban 45 faqe. Mes 4 akuzave kryesore është ajo për pengim të procesit zyrtar, që parashikon deri në 20 vjet burg.

Trump akuzohet se ka sulmuar kolonat e demokracisë në kuadër të një përpjekjeje të dështuar për të ruajtur pushtetin.

“Në këtë rast, zyra ime do të kërkojë një gjykim të shpejtë, në mënyrë që provat tona të testohen në gjykatë dhe të vlerësohen nga juria qytetare. Në të njëjtën kohë më duhet të theksoj se padia është vetëm një dyshim dhe se i pandehuri duhet të konsiderohet i pafajshëm derisa të provohet e kundërta përtej çdo dyshimi të arsyeshëm në një sallë gjyqi”, deklaroi hetues i posaçëm Jack Smith.

Trump është thirrur për t’u paraqitur në gjykatë të enjten në Uashington DC. Ai përballet edhe me çështjen tjetër për keqmenaxhim të dokumenteve të klasifikuara në Florida, atë për falsifikim të dokumenteve të bizneseve të tij dhe për pagesë të fshehtë për një aktore filmash për të rritur.

LEXONI GJITHASHTU:

• Trump akuzohet për komplot për përmbysjen e rezultatit të zgjedhjeve të vitit 2020
• Sondazhet në SHBA| Problemet ligjore nuk e cënojnë Trump, i rritet mbështetja