Deputeti i Bundestagut mesazh PD-së: Kemi pritshmëri të larta për PD-në, është koha për bashkim

Deputeti i Bundestagut gjerman nga CDU, Peter Beyer, bëri një deklaratë në Kuvendin Kombëtar të Partisë Demokratike, përmes një mesazhi online ku tha se ka ardhur koha për vendime të mëdha dhe për një riorganizim të ri në drejtimin e partisë.

“I nderuar zoti President, i nderuar Dr. Sali Berisha, delegatë, të ftuar, miq të Partisë Demokratike të Shqipërisë. Emri im është Peter Beyer dhe jam anëtar i grupit parlamentar CDU/CSU në Bundestagun gjerman, në Berlin. E vlerësoj këtë mundësi që t’ju drejtohem me disa fjalë. Ju keni një kongres shumë të rëndësishëm partiak. Merrni vendime të mëdha, zgjidhni një bord të ri, një kryetar të ri, një president të ri. Kam disa ide se kush mund të jetë, por do ta mbaj gojën mbyllur. Sa i përket sfidave që ju presin përpara dhe përgjegjësisë që vjen me to, dua të them sa vijon; Vendi juaj, Shqipëria juaj e mrekullueshme dhe e dashur, përballet me një sfidë shumë të madhe; rrugën drejt Bashkimit Europian. Ju jeni aktualisht partia opozitare më me ndikim dhe më e rëndësishme në Shqipëri dhe pritshmëritë nga unë, nga CDU-ja e Gjermanisë dhe sigurisht nga Europa dhe pjesa tjetër e botës janë shumë të larta.Ne mbështetemi te ju dhe ju lutem merreni këtë përgjegjësi me seriozitetin maksimal. Nuk ka kohë për konflikte mes jush apo konkurrencë të brendshme, por të gjithë duhet të përqendroheni, ashtu si ne në CDU në Gjermani, te një qëllim i vetëm; integrimi në Bashkimin Europian. Gjithashtu, kur bëhet fjalë për Shqipërinë – ju e dini këtë shumë më mirë se unë – duhet luftuar korrupsioni, duhet luftuar krimi i organizuar dhe duhet të jeni e të ofroni një alternativë të vërtetë për Shqipërinë, një udhëheqje që me të vërtetë i hap rrugën vendit tuaj drejt një të ardhmeje të begatë dhe të ndritur. Partia Demokratike e Shqipërisë është e dashur për zemrën time dhe ju përcjell urimet dhe përshëndetjet më të mira nga CDU-ja, Unioni Kristian Demokrat i Gjermanisë, drejt Tiranës”, u shpreh Beyer.

Në fjalën e tij, Beyer u shpreh se, megjithëse nuk mund të ishte fizikisht i pranishëm në kongres për shkak të angazhimeve të tjera, ai ndihet pranë demokratëve dhe ndjek me interes zhvillimet brenda partisë ndërsa u shpreh se ai dhe partia e tij kanë pritshmëri të larta për Partinë Demokratike dhe rolin e saj në procesin e integrimit europian të Shqipërisë ndërsa sipas tij, ky është një moment i rëndësishëm për bashkim dhe përqendrim te një objektiv i vetëm.