Dëshmia e shqiptarit për vrasjen e noteres greke: Tentuam ta grabisnim, por…

Është zbardhur dëshmia e 50-vjeçarit shqiptar, bashkëpunëtor në vrasjen e noteres 69-vjeçare në Zakynthos në shkurt të këtij viti, nga shoku i tij në tentativë për t’i vjedhur paratë.

Sipas autoriteteve greke, 50-vjeçari i cili jetonte në Nemea ka treguar se ideja për grabitjen i përkiste shokut të tij 54-vjeçari, i cili prej muajsh i fliste për viktimën, duke pretenduar se ajo kishte shumë para në shtëpi. Për herë të parë, ia kishte propozuar planin disa muaj më parë. Kur ai shprehu hezitime, bashkëpunëtori i tha: “Mos u shqetëso, gjithçka do të shkojë mirë, nuk do lëndojmë njeri.”

Të dy, dikur të punësuar në ndërtim, nisën vëzhgimet një ditë para grabitjes. Ata ndoqën lëvizjet e noteres, e cila, sipas tyre, largohej çdo ditë nga zyra në orën 20:00. Vendosën të vepronin mëngjesin e ditës fatale. Pavarësisht se ishte nën ndikimin e alkoolit, 54-vjeçari mori me vete një thikë nga kuzhina dhe refuzoi ta shtynte planin, edhe pse bashkëpunëtori i kërkoi të prisnin.

Të maskuar dhe me doreza për të shmangur gjurmët, ata i zunë pritë noteres pranë banesës së saj. Kur ajo filloi të bërtiste, 50-vjeçari propozoi të dorëzoheshin dhe të largoheshin, por 54-vjeçari refuzoi. Sipas dëshmisë, pas një përleshjeje me viktimën, ajo u godit me thikë në kofshën e majtë, duke pësuar një hemorragji fatale.

Edhe pse gruaja po humbiste gjak, autori këmbënguli të vazhdonin grabitjen, pa treguar shqetësim për gjendjen e saj. Pas ngjarjes, të dy ecën për më shumë se një orë për të shmangur kapjen. Më vonë u morën me makinë nga djali 19-vjeçar i autorit kryesor, i cili kishte rolin e shoferit dhe kishte hedhur thikën në një arë për të fshehur provat.

Në dëshminë e tij, 54-vjeçari që dyshohet se kreu krimin pretendon se goditja ndaj viktimës ishte aksidentale gjatë përleshjes. Nga ana tjetër, shoku i tij 50-vjeçar tha se kishte pranuar të përfshihej në grabitje për shkak të gjendjes së tij të rënduar financiare dhe borxheve tatimore.

Kujtojmë që tre shqiptarë – baba, bir dhe xhaxha – janë arrestuar nga autoritetet greke si autorë të dyshuar të vrasjes së noteres 69-vjeçare Mariza Tertseti Papadata, e cila u gjet e pajetë pranë banesës së saj në Zakynthos, në muajin shkurt.

3 shqiptarët vrasin noteren greke, flet gazetari: Si u zbulua pic.twitter.com/roeYO4Hdzd

— Euronews Albania (@EuronewsAlbania) May 27, 2025

 LEXONI GJITHASHTU:

• Vrasja e Altin Arapajt në Greqi, si u kap rastësisht shqiptari i dyshuar si autor
• Vritet shqiptari në Greqi, telefonon gruan para vdekjes e i tregon emrin e vrasësit