Dështon seanca për dëshminë e Erjon Alibej në GJKKO, mungojnë avokatët

Seanca e parashikuar për këtë të enjte në Gjykatën e Posaçme kundër Korrupsionit dhe Krimit të Organizuar, në kuadër të çështjes “Plumbi i Artë”, është shtyrë për në datën 17 qershor, ora 10:00, për shkak të mungesës së disa avokatëve mbrojtës.

Në vijim të kërkesës së Prokurorisë së Posaçme, gjykata ka vendosur të pezullojë afatet e paraburgimit për të gjithë të pandehurit në këtë çështje, deri në zhvillimin e seancës së radhës.

Në seancën e sotme pritej të vijonte dëshminë bashkëpunëtori i drejtësisë Erjon Alibej, i cili ka pranuar të bashkëpunojë me autoritetet pas arrestimit të tij për një sërë veprash të rënda penale.

Alibej akuzohet si kreu i një prej grupeve kriminale më të njohura në Elbasan dhe ndodhet në hetim për trafik ndërkombëtar droge dhe porositje atentatesh për motive hakmarrjeje. Në dëshminë e dhënë deri tani para trupës gjykuese, ai foli për përfshirjen e tij në rrjetet e trafikut të kokainës, si dhe për lidhjet me eksponentë të botës së krimit.

Në rrëfimin e tij, Alibej përmendi përplasjet me vëllezërit Franc dhe Hajdar Çopja, si dhe me Suel Çelën, me të cilët më herët kishte pasur marrëdhënie të afërta. Ai i akuzoi dy vëllezërit Çopja si të përfshirë në vrasjen e vëllait të tij, Endrit Alibej, gjatë ngjarjes së rëndë të njohur si “Masakra e Bradasheshit” e ndodhur në vitin 2020, ku mbetën të vrarë edhe Arben Dylgjeri dhe shtetasi turk Erdal Durunay.

LEXONI GJITHASHTU:

• “Betohem në Kuran, ta fal gjakun” Alibej dëshmon në GJKKO, zbulon bisedat me Dumanin
• Bandat e Elbasanit dhe tregu i kokainës, dëshmon Alibej: Si nisi përplasja me Çopjat