“Destinacion” eksploron plazhin e egër të Akernisë

Destinacion udhëton në plazhin e Akernisë në Vlorë ose plazhi i hidrovorit siç e quajnë vendasit.  Një vend magjik, me një brez rëre deri në 100 metra, deri sa këmbët të prekin ujërat e Adriatikut. Ai është një vend që deri kur të arrish, shoqërues ke flamingot dhe pelikanët dhe ku pylli përqark ka mbetur i paprekur.

Për të shkuar në këtë plazh nga Tirana, në autostradën Fier-Vlorë, merrni daljen e Novoselës e kthehuni djathtas për në fshatin Akërni e pasi ta lini mënjanë, ndiqni vetëm rrugën e asfaltuar drejt detit.

Rruga është e asfaltuar deri të hidrovori, më pas zgjerohet dhe është shtruar me çakull, por e kalueshme për të gjitha llojet e makinave. Kur të mbërrini në brezin e rërës, do merrni sërish djathtas e papritmas para jush do të shfaqet kjo pjesë e bukur e pyllit ku mes pemëve janë ndërtuar kasolle me kashtë e dru.

Në hyrje të plazhit është një pompë kripe që çonte ujin e detit përmes kanalit deri te kriporja. Dikur ajo ndodhej më shumë se 100 metra në thellësi të ujit, por tani është dukshëm në brezin e rërës dhe thuajse 100 metra larg detit. Procesi sigurisht ka dashur vite të ndodhë.

Minella Qarri, banori i zonës tregon për emisioni “Destinacion” se kush e ka ndërtuar pompën e kripës.

“Në Selvec ka qenë kampi i internimit ku ndodheshin të burgosurit politikë dhe prej tyre u ndërtua pompa e kripës. Edhe kanale vaditës në Novoselë është bërë prej tyre,” thotë banori i Novoselës, Minella Qarri.

Në këtë vend fantastik është një familje që jeton gjithë vitin këtu, familja Troka. Hektori, burri i shtëpisë na shoqëron me foristradë për te Godëlli, një pellg i madh që mbushet vetëm nga reshjet e shiut, tashmë pa ujë, por që ka dhe element të tjerë befasues.

Rruga nga lokali i Hektorit në plazh është fare e shkurtër, bëhet edhe më këmbë, por nëpër dunat e rërës lezeti është me makinë të lartë.

Peizazhi është fantastik, plazh i virgjër, rërë e pastër dhe asnjë këmbë njeriu përqark. Ky vend i ka shpëtuar betonizimit, pasi ky peizazh natyror i parkut Vjosë-Nartë është shpallur zonë e mbrojtur. Sipërfaqja totale është rreth 20 hektarë dhe në të do të gjeni pyje pishash, laguna, det dhe një mori shpendësh e kafshësh të rralla

Nëse do zgjidhni të vini në këtë plazh fantastik emisioni “Destinacion” ju jep disa këshilla. E para është të përgatisni ushqime e pije e t’i merrni me vete, ndërsa mund të hani edhe në lokal peshk të freskët e sallatë stine me çmim shumë të lirë. Për të pirë ju sugjeron të provoni pak Raki Xine që bëhet me bimën, Mirthon.