“Destinacion” mes peizazheve unike të Bjeshkëve në Buzëmadhe të Kukësit   

“Destinacion” udhëton në Buzëmadhe të Kukësit, një fshat me bukuri të pamat natyrore dhe me njerëz bujarë e punëtorë.

Për të shkuar në Buzëmadhe duhet të merrni rrugën nacionale Kukës-Peshkopi e cila ka shumë kthesa por është e asfaltuar. Nga qendra e Tiranës deri në fshat rruga zgjat rreth 3 orë e gjysmë, sidomos kur e bën për herë të pare dhe nuk e njeh mirë. E vetmja tabelë që ju orienton drejt Buzëmadhes është Teqja e Dervish Ismailit. Merrni majtas e ecni nëpër rrugën me çakull e cila mund të kalohet lehtësisht nga çdo makinë.

Toponimi i këtij fshati në kohë të hershme ka qenë Buzëmali, sepse ky fshat i bukur shtrihet mes tre maleve, por me kalimin gojë më gojë u transformua në Buzëmadhe.

Ndalesa e parë në këtë fshat është teqeja e Dervish Ismailit, e cila ndodhet në mes të një godine shërbimesh hotel e restorant që është ndërtuar pikërisht për pelegrinët e shumtë, që vijnë këtu për të marrë bekime e për të gjetur zgjidhje. Ajo është trashëgimi e familjes Shehu, dhe të gjitha ofrohen falas për besimtarët, të cilët të enjtet mbrëma i kalojnë në vendin e shenjtë.

Oborri i familjes Shehu është mbushur me makina të larta dhe prej këtej të gjithë nisen në bjeshkë, për të festuar ditën e Buzëmadhes që është caktuar të jetë si festë në çdo 20 korrik.  Rrugës për te vendi i festës të ofron një peizazh unik të bjeshkëve të Korit të Bardhë,  një burimi uji që është aq shumë i ftohtë sa nuk e mban dot dorën në të as 30 sekonda.

Banorët kanë ngritur çadrat te vendi i festës dhe kanë ndezur zjarre për të pjekur mishin e flinë, gatimin karakteristik të zonës. Sokol Hoda, kryeplaku i fshatit tregon më shumë detaje për Buzëmadhen.

“Ne jemi një fshat malor me 45 familje dhe merremi me bujqësi e blegtori. Festa që po zhvillojmë është një promovim për turizmin dhe Buzëmadhe është një vend shumë i bukur për turizëm malor. Fshati ka ujë, ajër të pastër, mikëpritje të jashtëzakonshme nga banorët e zonës,“ tha z. Hoda.

Festa e Buzëmadhes organizohet nga Muharrem Durra dhe Ylli Shehu, që cilët duan të promovojnë vlerat dhe mbajnë të bashkuar banorët e zonës së tyre, përpos qëllimit kryesor, promovimin e turizmit në Buzëmadhe.

Të rinjtë e fshatit, nën muzikën e cyrleve e daulles kapen dorë më dorë e hedhin valle. Në krye lënë një çift turistësh rumunë që është gjendur rastësisht në bjeshkë dhe është ftuar nga banorët e Buzëmadhes për të festuar me ta. Në mes të të pranishmëve ka shumë që kanë ardhur nga Tirana, për këtë festë të rëndësishme që i mbledh të gjithë bashkë.