Drejtuesja e shoqatës “Gruaja tek Gruaja“, Trendelina Boriçi tregon detaje nga takimi i fundit me Anila Ndokën, 44-vjeçaren që u qëllua me plumb në kokë nga bashkëjetuesi i saj.
Lajmi i ka shokuar të gjithë, ndërsa Boriçi tregon se Anila ka qenë me detyrë psikologe, e pikërisht e përshirë në rastet e dhunës ndaj grave dhe fëmijëve.
“Në fakt ngjarja është tronditëse për çdo qytetar, aq më tepër për personat që kanë bashkëpunuar me të, e kanë njohur më nga afër dhe kanë pasur dijeni dhe njohuri për kontributin në fushën në të cilën ajo ka dhënë kontribut. Organizata ‘Gruaja te gruaja’ ka qenë një strehëz emergjence për gratë dhe vajzat e dhunuara. Anila ishte pjesëtare e këtij grupi on call dhe bashkëpunimi i ‘Gruaja tek gruaja’ me Anilën ishte pikërisht këtu, domethënë, punonjëse e strehëzës së emergjencës dhe kontributi i saj ka qenë pikërisht këtu, në pritjen në akomodimin e tyre”, shprehet Boriçi.
Borici thotë se në takimin e fundit me të nuk ka shprehur asnjë shqetësim në familje, ndërsa thotë se nuk ka pasur asnjë pengim për të punuar edhe turnin e natës.
“Komunikimi me të ka qenë më tepër përmes punës. Ajo para dy ditësh ishte në turnin e strehëzës, por nuk është se ka shfaqur ndonjë problematikë”, tregon ajo.
Në syrin e psikologes, ndjenja femërore e mbrojtjes mund ta ketë penguar Anilën për ta shprehur këtë problematikë me të tjerët apo ta denoncojë.
24 orë pas ngjarjes së rëndë të ndodhur në Shkodër, Anila Ndoka vijon të jetë në gjendje të rëndë për jetën.
Burime pranë spitalit rajonal të Shkodrës bëjnë me dije se gjendja e pacientes është kritike dhe ka pasur disa herë tentativa për ta dërguar për ndihmë të specializuar në Tiranë por që kanë dështuar për shkak të gjendjes së rëndë. Ndërkohë policia vijon hetimet në lidhje me ngjarjen ndërsa janë hapur telefonat për të këqyrur komunikimet e fundit mes tyre.
Burime bëjnë me dije se 34-vjeçari Kolë Manaj i ka dërguar mesazh Anilës, në gjendje të rëndë psikologjike, duke i thënë që do lëndonte veten në rast se nuk do ishin më bashkë. Anila i ka kërkuar të vinte ta takonte tek puna, në lagjen ‘Mark Lula’ ku me pas ka ndodhur dhe ngjarja e rëndë.
