Dhimbje dhe vargje varresh të hapura. Pamjet përsëriten në disa fshatra në lindje të Afganistanit, të tronditur nga tërmeti më i keq në dy dekada, që goditi vendin të mërkurën, duke lënë rreth 1 mijë të vdekur dhe mbi 1500 të plagosur.
Zonat e prekura janë të largëta dhe aksesi në to i vështirë, por kjo nuk është sfida më e madhe OJQ-ve që veprojnë në vendin e udhëhequr nga talebanët e ku miliona njerëz po vdesin nga uria.
“Ne mund t’u ofrojmë atyre mbështetje humanitare, që do t’i ndihmojë dhe shpëtojë jetën në terma afatshkurtër. Ajo që nuk duam të shohim është që njerëzit e prekur nga tërmeti të jetojnë në kampe apo vendbanime informale,” – u shpreh Rebecca Roby nga Këshilli Norvegjez për Refugjatët.
Ndërtimet me tulla apo prej qerpiçi janë të shumta. Tërmeti thuajse 6-ballësh varrosi familje të tëra teksa flinin dhe la mijëra të tjera të pastreha.
“Kam 4 martirë në familjen time, të cilët i varrosa sot, si dhe 12 anëtarë të tjerë të plagosur. Ndihem e pashpresë, nuk kam asnjë qindarkë,” – u shpreh një qytetare.
Pjesa dërrmuese e operacioneve të shpëtimit po bëhet me duar. Disa fshatra janë izoluar dhe mund të arrihen vetëm me helikopter. Katastrofa përbën një sfidë madhore logjistike për qeverinë e talebanëve, e izoluar nga bota pasi vendosi ligjin e ashpër islamik.
LEXONI GJITHASHTU:
