Dhjetë vjet para vrasjes, regjisori amerikan ka bërë film për varësinë e të birit

Dhjetë vjet para vrasjes së tmerrshme të Rob Reiner dhe gruas së tij Michelle në shtëpinë e tyre në Los Angeles nga  djali i tyre, baba dhe bir kishin bashkëpunuar në filmin ” Being Charlie” , një dramë gjysmë-autobiografike që dokumenton tensionet e një familjeje rreth varësisë së djalit të tyre të vogël.

Filmi, i cili u shfaq premierë në Festivalin e Filmit në Toronto në vitin 2015, u shkrua bashkërisht nga Nick Reiner dhe u drejtua nga babai i tij, duke u mbështetur në përvojat personale të familjes.

Sipas autoriteteve, Nick Reiner është arrestuar dhe përballet me akuza për vrasjen e prindërve të tij , me policinë e Los Angeles që deklaron se ai “mban përgjegjësi për vdekjet e tyre”. Çifti u gjet i vdekur nga vajza e tyre, me plagë fatale të shkaktuara nga thikë në qafë.

“Being Charlie” ndjek historinë e 18-vjeçarit Charlie, djalit të një aktori të famshëm i cili lufton me varësinë dhe përplaset me prindërit e tij për shtrimet e detyrueshme në qendrat e rehabilitimit. Roli i “babait” luhet nga Cary Elwes, ndërsa i djalit luhet nga Nick Robinson.

Në intervistat e mëparshme, Rob Reiner kishte pranuar se filmi ishte “terapeutik”, duke pranuar gabimet në mënyrën se si prindërit e trajtuan varësinë e djalit të tyre, ndërsa Michelle Reiner kishte folur për ndikimin e “ekspertëve” që i çuan ata të merrnin vendime të vështira.

Rob Reiner e kishte përshkruar filmin “Being Charlie” si “punën më personale” që kishte bërë deri në atë pikë, duke shpjeguar se procesi i krijimit të filmit e detyroi të shihte më qartë atë që kishte përjetuar djali i tij dhe të reflektonte mbi rolin e tij si baba. Siç kishte deklaruar në vitin 2016, kjo përvojë i afroi ata, pasi të dy duhej ta kuptonin më thellë perspektivën e njëri-tjetrit.

Nga ana e tij, Nick Reiner kishte deklaruar në atë kohë se përmes xhirimeve ai filloi ta shihte të atin ndryshe, duke njohur përvojën dhe mënyrën se si ai shprehet në mënyrë krijuese përmes kinemasë. Bashkëpunimi i tyre shërbeu si një urë komunikimi gjatë një periudhe kur marrëdhënia e tyre po vihej në provë të rëndë.

LEXONI GJITHASHTU:

• Vrasja e regjisorit brilant Rob Reiner dhe gruas së tij, arrestohet djali i tij
• Dyshohet se vrau nënën dhe babanë, kush është djali i regjisorit të njohur amerikan