Vrasja e regjisorit brilant Rob Reiner dhe gruas së tij, arrestohet djali i tij

Nick Reiner, djali i regjisorit të njohur amerikan Rob Reiner dhe Michele Singer Reiner, ndodhet në paraburgim, i dyshuar për vrasjen e prindërve të tij.

Sipas Departamentit të Sherifit të Los Angeles (LASD), 32-vjeçari është arrestuar dhe përballet me akuza për vrasje të rëndë penale.

Ngjarja ka tronditur Hollywood-in. Rob Reiner, 78 vjeç, dhe bashkëshortja e tij Michele Singer Reiner, 68 vjeçe, u gjetën të pajetë në rezidencën e tyre luksoze në Brentwood, Los Anxhelos. Autoritetet amerikane bëjnë me dije se viktimat dyshohet se janë goditur për vdekje me thikë.

Sipas policisë, banesa, e vlerësuar rreth 13.5 milionë dollarë, nuk kishte shenja thyerjeje apo hyrjeje me forcë. Trupat u zbuluan nga vajza e tyre, Romy Reiner, e cila jeton përballë dhe kishte shkuar t’i vizitonte.

Hetimet janë përqendruar te djali i çiftit, Nick Reiner, i cili u mor në pyetje dhe më pas u dërgua në paraburgim. Ai ka folur më herët publikisht për problemet e tij me varësinë nga droga dhe periudhat e vështira jetësore.

Zëvendësshefi i Policisë së Los Anxhelosit, Alan Hamilton, deklaroi se hetimet po vijojnë intensivisht dhe se disa anëtarë të familjes janë intervistuar. Kapiteni i LAPD-së, Mike Bland, e ka cilësuar rastin si një “homicid të dukshëm”, duke konfirmuar përfshirjen e Njësisë së Krimeve të Rënda.

Vdekja e Rob Reiner shënon humbjen e një prej figurave më të rëndësishme të kinemasë amerikane. Ai ishte regjisor i filmave të njohur si This Is Spinal Tap, The Princess Bride, When Harry Met Sally dhe A Few Good Men, si dhe bashkëthemelues i Castle Rock Entertainment.

Michele Singer Reiner ishte producente dhe fotografe e njohur. Çifti ishte i martuar prej vitit 1989 dhe kishte tre fëmijë.

LEXONI GJITHASHTU:

• Regjisori Rob Reiner dhe gruaja e tij gjenden të vdekur në shtëpi, dyshimet e para
• Roberto Mançini “braktis” Arabinë, italiani largohet nga kombëtarja saudite