Sulme të ndryshme izraelite në Gaza kanë lënë disa dhjetëra persona të vrarë. Më i rëndi i sulmeve ka qenë ai ndaj një godine të banuar pranë spitalit “Kamal Aduan”, në veri të Gazës, ku mbetën të vrarë 28 persona. Ndërkohë, viktimat e tjera u verifikuan në sulmet ndaj kampeve të refugjatëve.
Ndërkohë, zëdhënësi i ushtrisë izraelite, Daniel Hagari njoftoi se një trup i katërt i pengjeve izraelite ishte rikuperuar, një ditë pasi trupat hebraike kishin marrë trupat e tre pengjeve të tjera.
Mbrëmjen e së shtunës, në Tel Aviv, mijëra qytetarë u mblodhën për të kërkuar zgjedhje të reja dhe largimin e kryeministrit Netanyahu. Duke mbajtur banera dhe duke bërtitur parulla të ndryshme, protestuesit kërkuan edhe lirimin e dhjetëra pengjeve që vazhdojnë të mbahen në Gaza.
Ndërkohë, ministri i kabinetit të luftës, Benny Gantz kërcënoi se do të japë dorëheqjen nëse kryeministri Netanyahu nuk harton një plan për periudhën e pasluftës për në Rripin e Gazës.
LEXONI GJITHASHTU:
- Protesta të dhunshme në Izrael, kërkohet marrëveshje urgjente për pengjet
- Turqia kufizon eksportet në Izrael, shkak Gaza
