DHL i kërkon KQZ-së lekët e “diasporës”, fatura 9 milionë euro

Me përfundimin e zgjedhjeve të 11 majit, DHL kompania që mundësoi votën e diasporës përmes shërbimit postar kërkon të paguhet.

Për të disatën herë ajo i është drejtuar Komisionit Qendror të Zgjedhjeve me kërkesën se ky i fundit nuk i ka shlyer detyrimin financiar.

Sipas DHL-së fatura e votës së diasporës për zgjedhjet e 11 majit është 863 milionë e 906 mijë lekë ose rreth 9 milionë euro.

Në kërkesën e saj kompania e vë në dijeni KQZ-ën se në rast të vonesës për kryerjen e pagesës pasi sipas DHL-ës ajo i ka përmbushur të gjitha detyrimet, do të zbatohet edhe kamatëvonesa sipas asaj që parashikon ligji.

“Në këto kushte kamatëvonesa që aplikohet detyrimisht është 10.75% deri më datë 30 qershor 2025 dhe 10.5 % për mos pagesë pas kësaj date e në vijim. Kamatëvonesa do të maturohej deri me datë 30 shtator 2025, në rast mospagese do të ishte në shumën prej 26 milionë e 14 mijë lekëve. Një zhvillim i tillë do të kishte pasoja financiare që mund të çonin në tejkalim të parashikimeve buxhetore të përcaktuara në kontratën e shërbimeve”, bën me dije kompania.

Me gjithë paralajmërimin se vota e diasporës rrezikon të shtrenjtohet, kompania deklarohet e gatshme që të heqë dorë nga kamatëvonesat me kushtin që KQZ të shlyejë lekët brenda 15 ditëve pas datës 1 shtator.

Nga ana e saj KQZ në një përgjigje për Euronews Albania për kërkesën e kompanisë deklaron:

“Komisioni Qendror i Zgjedhjeve nuk ka disbursuar ende asnjë pagesë ndaj kontraktorit. Gjithashtu, raporti i zbatimit të kontratës nuk është finalizuar për shkak të vëllimit të madh të të dhënave që kërkojnë përpunim dhe angazhimit të stafit në procesin e numërimit/vlerësimit të votave nga jashtë vendit, trajtimit të ankimimeve, si dhe procesit të rinumërimit në vijim”.

Jo vetëm diaspora e bëri votën e 11 majit më të shtrenjtën në historinë e zgjedhjeve, por ajo u shoqërua edhe me shumë problematika siç ishte rasti i zarfeve me fletët e votimit në Greqi, që shumë emigrantëve nuk u mbërriti në derë të shtëpisë.

LEXONI GJITHASHTU:

• Vota e diasporës/ PD: DHL shkeli kontratën, Celibashi po na pengon të ankimojmë
• Aksioni opozitar në vjeshtë, Berisha: Do mobilizojmë shqiptarët e diasporës